Ռուս-ադրբեջանական հարաբերություններում կրքերը թեժանում են, լեզվակռիվը՝ շարունակվում․ Eurasianet
Ադրբեջանա-ռուսական կրքերը կրկին բորբոքվում են ՌԴ կողմից ադրբեջանական քաղաքացիական ինքնաթիռի պատահական խոցման պատճառով: Հռետորական սպարինգի այս ռաունդը պարունակում է անձնական հարձակումներ, որոնք կարող են դժվարացնել կողմերից յուրաքանչյուրի հետ կանգնելը՝ այդպիսով մեծացնելով երկկողմ հարաբերությունների խզման վտանգը․ գրել է Eurasianet-ը:
Վեճը վերսկսվել է դեկտեմբերի 25-ին տեղի ունեցած վթարի վերաբերյալ Ղազախստանի քննիչների կողմից նախնական եզրակացությունների հրապարակումից հետո: Առանց Ռուսաստանին հատուկ մեղադրելու՝ զեկույցում նշվում է, որ ինքնաթիռին հարվածել են «արտաքին» մետաղական առարկաներ Գրոզնիի երկնքում: Զեկույցում, ընդհանուր առմամբ, հաստատվել է իրադարձությունների ադրբեջանական վարկածը, որով ինքնաթիռը կրիտիկական վնաս է կրել ռուսական հակաօդային պաշտպանության կրակից:
Մինչդեռ Ռուսաստանը համառորեն մերժել է ադրբեջանական պահանջը՝ պատասխանատվություն ստանձնել և փոխհատուցում վճարել զոհերին և նրանց ընտանիքներին: Լարվածության սրմանը նպաստել է «Ռոսսոտրուդնիչեստվոյի»՝ Բաքվի գրասենյակի փակումը. մի կազմակերպություն, որն օգտագործվում է Ռուսաստանի կողմից փափուկ ուժ գործադրելու համար: Այս քայլը լայնորեն մեկնաբանվել է որպես ադրբեջանական դժգոհության ազդանշան:
Ադրբեջանը հավելյալ ծրագրում է հայց ներկայացնել միջազգային դատարան՝ ավիավթարի կապակցությամբ արդարադատություն գտնելու համար։ «Մինչ կործանումն ադրբեջանա-ռուսական հարաբերությունները, կարծես թե, ամուր էին, իսկ ինքնահռչակ ռազմավարական գործընկերները օգտվում էին հյուսիս-հարավ ամուր առևտրից: Երկու կողմերը անցյալ հոկտեմբերին սերտացրել էին համագործակցությունը նաև անվտանգության ոլորտում՝ իբր տարածաշրջանում արևմտյան ազդեցությանը դիմակայելու նպատակով: Սակայն վթարից հետո յոթ շաբաթվա ընթացքում կապերն ապշեցուցիչ արագությամբ փչացան», – գրել է կայքը:
Միևնույն ժամանակ, տարբեր ռուս պաշտոնյաներ վիրավորական բառամթերք են սկսել կիրառել Բաքվի դեմ։ Եվգենի Պրիմակովը՝ «Ռոսսոտրուդնիչեստվոյի» ներկայիս ղեկավարը, Բաքվի արձագանքը ինքնաթիռի կործանմանը բնութագրել է որպես «չափազանց զգացմունքային» և հույս հայտնել, որ Բաքուն շուտով «կդադարեցնի այդ զգացմունքները, և կգտնվի համարժեք, ողջամիտ լուծում»։
Պետդումայում ԱՊՀ-ի հարցերով Կրեմլի գլխավոր պատասխանատուն՝
Կոնստանտին Զատուլինը, ուղղակիորեն թիրախավորել է Ալիևին. «Ադրբեջանի հավակնություններն այնքան ամբարտավան են», որ նա զգում է, որ «կարող է նվաստացնել Ռուսաստանին»: Նա ենթադրել է, որ Իլհամ Ալիևի հայրը՝ Խորհրդային Միության նախկին քաղբյուրոյի անդամ և Ադրբեջանի նախկին ղեկավար Հեյդար Ալիևը, այլ կերպ կվարվեր այս իրավիճակում, եթե դեռ կենդանի լիներ: «Ավելի խելամիտ կլիներ: Իլհամ Ալիևը, որն ինքնաթիռի կործանման առաջին օրերին բացահայտորեն քննադատում էր Ռուսաստանին, վերջին շրջանում լռում է, թեև նախագահական կայքը շարունակում է հրապարակել աշխարհի երկրների ղեկավարներից ստացված ցավակցական նամակները։ Պետությանն առնչվող որոշ լրատվամիջոցներ, սակայն, սկսել են արձագանքել՝ օգտագործելով ծաղրական և գռեհիկ արտահայտություններ՝ թիրախավորելով ռուս քննադատներին: «Կրեմլին մոտ կանգնած քարոզիչների ներկայիս հռետորաբանությունը լուրջ հիմքեր է տալիս մտածելու, թե ինչ է կատարվում ռուսական իշխող շրջանակներում», – գրել է պետականամետ ադրբեջանական ԶԼՄ- ներից մեկը:
