Ադրբեջանում վերջին մեկ տարում առնվազն 25 լրագրող է ձերբակալվել շինծու մեղադրանքներով. IPI

Ադրբեջանի իշխանությունները պետք է անհապաղ ազատ արձակեն բանտում գտնվող լրագրողներին և վերջ տան անկախ լրատվամիջոցների դեմ ճնշումների ալիքին. նշվել է IPI գլոբալ ցանցի հայտարության մեջ, որը դատապարտել է լրագրողներ Շամշադ Աղայի և Շահնազ Բեյլարգազիի ձերբակալությունները:

Ընդգծվել է, որ ներկայումս Ադրբեջանի բանտերում գտնվող լրատվամիջոցների աշխատողների թիվը գերազանցում է 20-ը, քանի որ իշխանությունները սկսել են բռնաճնշումների արշավը 2023 թվականի նոյեմբերին: Հեռուստաալիքով հեռարձակված հարցազրույցում Աղայի եղբայրը՝ Շահիդը, հայտնել է, որ ձերբակալությունը տեղի է ունեցել գիշերը ժամը 02։00-ին տանը՝ 7 կամ 8 դիմակավորված ոստիկանների կողմից իրականացված խուզարկության ժամանակ։

Անվտանգության ուժերը նաև խուզարկություն են անցկացրել ամբողջ տանը և առգրավել հեռախոսներ և համակարգչային տեխնիկա։ Ե՛վ Աղան, և՛ Բեյլարգազին մեղադրվել են «արտարժույթի մաքսանենգության» մեջ և նախնական կալանքի տակ են: Այս վերջին միջադեպը հաջորդում է դեկտեմբերին Meydan TV-ի լրագրողների դեմ ձերբակալությունների ալիքին և 2024 թվականի մարտին Toplum TV-ի լրագրողների ձերբակալությունների նախորդ շարքին: 2025 թվականի փետրվարի դրությամբ IPI-ն տեղյակ է առնվազն 25 լրագրողների մասին, ովքեր ձերբակալվել են վերջին մեկ տարվա ընթացքում շինծու մեղադրանքներով, ինչպիսիք են արժույթի մաքսանենգությունը և շորթումը: Հաղորդվում է, որ նրանցից շատերը կալանքի տակ գտնվելու ընթացքում ենթարկվել են խոշտանգումների և այլ վատ վերաբերմունքի: