Ադրբեջանը շարունակում է անողոք ջանքերը՝ լռեցնելու այլախոհ ձայները երկրում․ HRW
Այս ամիս Ադրբեջանի դատարանը մեղավոր է ճանաչել երկրի ընդդիմադիր հայտնի առաջնորդ Թոֆիգ Յագուբլուին շինծու մեղադրանքներով՝ դատապարտելով նրան 9 տարվա ազատազրկման: Յագուբլուի հետապնդումը և բանտարկությունը Ադրբեջանի կառավարության անողոք ջանքերի մի մասն են՝ լռեցնելու այլախոհ ձայները երկրում․ գրել է միջազգային իրավապաշտպան կազմակերպությունը Human Rights Watch-ը:
64-ամյա Յագուբլուն նախկին լրագրող է և Ժողովրդավարական ուժերի ազգային խորհրդի, ընդդիմադիր կուսակցությունների և ժողովրդավարության կողմնակիցների կոալիցիայի ավագ անդամ: 2023 թվականի դեկտեմբերին Յագուբլուի ձերբակալությունից հետո ոստիկանությունը խուզարկել է նրա տունը և պնդում է, որ գտել են 5000 եվրո (մոտ 5427 ԱՄՆ դոլար), 2500 ադրբեջանական մանաթ (մոտ 1470 ԱՄՆ դոլար) և չճշտված չափի գումար՝ ԱՄՆ դոլարով: Իշխանությունները պնդում են, որ Յագուբլուն ներգրավված է կեղծ փաստաթղթեր երրորդ կողմին մատակարարելու սխեմայում: Յագուբլուն և նրա ընտանիքը հերքում են, որ իրենց մոտ եղել է գումար և կարծում են, որ ոստիկանությունն այն տեղադրել է խուզարկության ժամանակ: Սա առաջին անգամ չէ, որ Յագուբլուն հայտնվում է բանտում։ Տարիներ շարունակ իշխանությունները նրան հետապնդել են քաղաքական դրդապատճառներով։ Նա երեք տարի անցկացրել է ճաղերի հետևում և 2016-ին ազատ արձակվելուց հետո նա կրկին ձերբակալվել է 2019-ի հոկտեմբերին՝ չարտոնված հանրահավաքին մասնակցելուց հետո։ 2021 թվականին նա ենթարկվել է դաժան վերաբերմունքի կալանքի տակ՝ ի պատասխան իր ակտիվության։ Յագուբլուն տասնյակ ընդդիմադիր գործիչների, լրագրողների, իրավունքների պաշտպանների, գիտնականների և ակտիվիստների թվում է, որոնց դեմ իշխանությունները քաղաքական դրդապատճառներով ձերբակալությունների ալիք են բարձրացրել:
Ադրբեջանի կառավարության՝ քրեական արդարադատության համակարգը իր քննադատների դեմ վրեժ լուծելու համար օգտագործելու օրինաչափությունը լավ փաստագրված է, այդ թվում՝ Մարդու իրավունքների եվրոպական դատարանի կողմից:
Իշխանությունները պետք է անհապաղ ազատ արձակեն Յագուբլուին և մյուս անարդարացիորեն բանտարկված լրագրողներին ու ակտիվիստներին և թույլ տան նրանց գործել առանց կառավարության անհարկի միջամտության:
