Դեռևս շատ աշխատանք կա անելու, որպեսզի հայ-ադրբեջանական խաղաղությունը տևական և կայուն լինի. Common Space
Ադրբեջանը կանգ չառնելու սովորություն ունի: Հայաստանի Սահմանադրության մեջ փոփոխություններ կատարելու պահանջը, ըստ Ադրբեջանի ԱԳՆ-ի, «երկարատև և սկզբունքային է»: Բայց խաղաղության համաձայնագրի ստորագրման համար դա պայման դնելն անազնիվ է, քանի որ Հայաստանի Սահմանադրության փոփոխությունները երկար գործընթաց են լինելու, որն անխուսափելիորեն կհայտնվի Հայաստանի խառնաշփոթ ներքաղաքական երկխոսության մեջ, գրել է Common Space-ը:
Ըստ հեղինակի՝ Մինսկի խմբի հետ կապված պահանջն ավելի իրատեսական է, քանի որ այս կառույցը տարիներ շարունակ չի գործում։ Այստեղ պատասխանատվությունը ոչ թե Հայաստանի, այլ՝ ԵԱՀԿ երեք համանախագահ երկրների (Ֆրանսիա, Ռուսաստան և ԱՄՆ) վրա է: Դա որպես խաղաղության համաձայնագրի ստորագրման պայման դնելը լավագույն դեպքում օգտակար չէ, և կարելի է նույնիսկ տարօրինակ անվանել: Այժմ կողմերը պետք է պայմանավորվեն խաղաղության համաձայնագրի ստորագրման ժամանակի և վայրի շուրջ։ Ինչպես նշվել է, տեղը կարևոր չէ, բայց պայմանագիրը պետք է ստորագրվի որքան հնարավոր է շուտ և առանց հապաղելու։ Այն, որ Հայաստանն ու Ադրբեջանը հաջողությամբ ավարտել են բանակցությունները խաղաղության համաձայնագրի տեքստի շուրջ, ճիշտ ուղղությամբ քայլ է, բայց միայն մեկ քայլ: Դեռևս շատ աշխատանք կա անելու, որպեսզի հայ-ադրբեջանական խաղաղությունը տևական և կայուն լինի: Ցանկացած խաղաղ համաձայնագիր պետք է շահագրգռվածություն առաջացնի կողմերի և ընդհանրապես բնակչության մոտ: Այստեղ աշխատանքը գրեթե չի սկսվել։ Հայաստանի և Ադրբեջանի ղեկավարները՝ Նիկոլ Փաշինյանը և Իլհամ Ալիևը, շատ տարբեր են և ղեկավարում են կառավարման շատ տարբեր մոդելներ։ Բայց երկուսն էլ նստած են ուղղահայաց կառույցների վերևում, ինչը նրանց տալիս է մեծ ինքնավստահություն և հավատ՝ սեփական ուժերի նկատմամբ: Դա նրանց հնարավորություն է տվել բանակցել և համաձայնության գալ խաղաղության համաձայնագրի շուրջ։ Բայց հիմա իրավիճակը տեղափոխվում է նոր փուլ։ Սա կպահանջի այլ մոտեցում և հմտություններ:
«Եթե երբևէ եղել է հայերի և ադրբեջանցիների միջև երկխոսության և վստահության ամրապնդման ժամանակ, դա հիմա է: Երկխոսությունն այժմ պետք է դառնա նորմ և ներգրավի հասարակության բոլոր շերտերին։ Սա դժվար կլինի, քանի որ իրավիճակը դեռևս փխրուն է, և սխալը կամ սադրանքը կարող են վատ ազդեցություն ունենալ բոլորի վրա: Բայց դա ռիսկ է, որը պետք է ընդունել, և երկխոսության գործընթացը պետք է ընդլայնվի», – նշվել է հոդվածում: Բաքվի և Երևանի կառավարությունները պետք է ակտիվացնեն միջազգային հանրության էներգիան՝ աջակցելու իրենց խաղաղության համաձայնագրին։
