Քաղաքականության մեջ կա մրցակցություն, ոչ թե թշնամություն․ Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ գլխավոր ընդդիմադիր Ժողովրդահանրապետական կուսակցությունը դարձել է մարգինալ կազմակերպություն՝ խոչընդոտելով Ստամբուլի քաղաքապետ Էքրեմ Իմամօղլուի դեմ գործի հետաքննությանը և փողոցային ահաբեկչության քաղաքականություն վարելով։

«Քաղաքականության մեջ կա մրցակցություն, ոչ թե թշնամություն: Քաղաքականության մեջ փողոցային ահաբեկչության և վանդալիզմի տեղ չկա»,- հայտարարել է Էրդողանն Անկարայում՝ իր ղեկավարած իշխող «Արդարություն և զարգացում» կուսակցության տարածաշրջանային մասնաճյուղերի ղեկավարների հետ հանդիպման ժամանակ:

Ըստ Էրդողանի՝ ընդդիմության առաջնորդ Օզգյուր Օզելը կոռուպցիայի հետաքննությանը նպաստելու փոխարեն խոչընդոտում է դրան և «փորձում է կոծկել Ստամբուլում տեղակայված հանցավոր կազմակերպությունները»։ Թուրքիայի նախագահը նաև հավելել է, որ «Իմամօղլուի գործով» Արևմուտքի աջակցությունն ապահովելու ընդդիմության փորձերը ձախողվել են։

Ավելի վաղ հաղորդվել էր, որ Էրդողանը դատական հայց է ներկայացրել Օզելի դեմ, ով նրան անվանել է «խունտայի առաջնորդ»։ Թուրքիայի նախագահի փաստաբան Հուսեյն Այդինի խոսքով՝ հայցը պարունակում է վիրավորանքների համար 500 հազար լիրա (մոտ 13,1 հազար դոլար) բարոյական վնասի փոխհատուցման պահանջ։ Ապրիլի 6-ին Օզելը վերընտրվել է կուսակցության ղեկավարի պաշտոնում։ Իր ելույթի ժամանակ քաղաքական գործիչը Էրդողանին և նրա կառավարությանը համեմատել է պուտչիստների հետ և նրանց անվանել «երկիրը գրաված խունտա»։

Իմամօղլուն կալանավորվել էր մարտի 19-ին կոռուպցիայի և ահաբեկիչների հետ կապերի մեղադրանքով և ձերբակալվել մարտի 23-ին՝ կոռուպցիոն գործով դատարանի որոշմամբ։ Ստամբուլի քաղաքապետի ձերբակալությունից հետո Թուրքիայում բողոքի ալիք է բարձրացել։ Ամենամեծ ցույցերը կազմակերպվել են Ստամբուլում, Անկարայում և Իզմիրում։