Թրամփը չօգտագործեց Ցեղասպանություն եզրույթը․ ԱՄՆ Նախագահի ուղերձը՝ Հայոց Ցեղասպանության զոհերի հիշատակի օրվա կապակցությամբ
ԱՄՆ նախագահ Դոնալդ Թրամփը ուղերձ է հղել Հայոց Ցեղասպանության զոհերի հիշատակի օրվա կապակցությամբ՝ առանց օգտագործելու Ցեղասպանություն եզրույթը․
«Այսօր մենք հիշատակում ենք Մեծ Եղեռնը և հարգանքի տուրք ենք մատուցում այն հրաշալի հոգիների հիշատակին, ովքեր տուժել են 20-րդ դարի ամենասարսափելի աղետներից մեկի ընթացքում։ Սկսած 1915 թվականից՝ Օսմանյան Կայսրության վերջին տարիներին, մեկ ու կես միլիոն հայեր արտաքսվեցին և մահվան երթերի ենթարկվեցին։ Այս Հիշատակի օրը մենք կրկին միանում ենք Ամերիկայի և ամբողջ աշխարհի Հայ Համայնքին՝ սգալով այդ բազմաթիվ կյանքերի կորուստները։
Ամեն տարի ապրիլի 24-ին մենք անդրադառնում ենք ամերիկյան և հայկական ժողովուրդների միջև առկա ամուր ու երկարատև կապերին։ Մենք հպարտ ենք 1915 թվականին ստեղծված Հայկական և սիրիական օգնության ամերիկյան կոմիտեով, որը բացառիկ հումանիտար աջակցություն է ցուցաբերել հայ փախստականներին, և երախտապարտ ենք հազարավոր ամերիկացիների, ովքեր նվիրատվություն կամ կամավորություն են կատարել՝ օգնելու իրենց տներից արտաքսված հայերին։
Այս օրը մենք վկայում ենք հայ ժողովրդի տոկունությունն ու դիմացկունությունը՝ ի պատասախան ողբերգության։ Մենք բախտավոր ենք, որ բազմաթիվ հայեր բերել են իրենց հարուստ մշակույթը մեր ափեր՝ զգալի ներդրում ունենալով մեր երկրի կյանքում՝ որպես հերոս զինվորներ, հանրաճանաչ արվեստագետներ, հայտնի ճարտարապետներ և հաջողակ գործարարներ։
Հարգանքի տուրք մատուցելով զոհվածների հիշատակին՝ իմ վարչակազմը մնում է հավատարմորեն նվիրված կրոնական ազատությունների պահպանմանն ու խոցելի փոքրամասնությունների պաշտպանությանը։ Մենք ակնկալում ենք շարունակել մեր ռազմավարական գործընկերությունը Հայաստանի հետ և պահպանել տարածաշրջանային կայունությունը՝ շարունակելով ձգտել տևական բարգավաճման և անվտանգության», – ասված է ԱՄՆ նախագահի ուղերձում։ ։
