Պեսկովը Պուտին-Թրամփ համդիպումը որակել է «պահանջված»
Կրեմլը կարծում է, որ Ռուսաստանի և ԱՄՆ-ի նախագահներ Վլադիմիր Պուտինի և Դոնալդ Թրամփի միջև հանդիպումը պահանջված է, սակայն այն պետք է լավ պատրաստված լինի․ հայտարարել է Ռուսաստանի առաջնորդի մամուլի քարտուղար Դմիտրի Պեսկովը։
«Նման հանդիպման մասին ակնհայտորեն բոլորը խոսում են։ Շատ առումներով մենք կարծում ենք, որ այն, իհարկե, անհրաժեշտ է։ Այն պետք է համապատասխանաբար նախապատրաստվի, և դա պահանջում է ջանքեր տարբեր փորձագիտական մակարդակներում։ Սա պահանջում է Մոսկվայի և Վաշինգտոնի միջև շարունակական շփումներ, որոնք սկսվել են և ներկայումս շարունակվում են։ Այս հարցի վերաբերյալ դեռևս մանրամասներ չկան», – նշել է նա՝ պատասխանելով հարցին, թե արդյոք Պուտինը կարո՞ղ է Թրամփի հետ հանդիպել Սաուդյան Արաբիայում՝ մայիսին։
Դմիտրի Պեսկովը հայտարարել է նաև, որ ծանոթ չէ Կիևի և Վաշինգտոնի միջև հանքանյութերի վերաբերյալ համաձայնագրի բովանդակությանը, ուստի չի կարող մեկնաբանել այն։
Նա հավելել է, որ Ռուսաստանը պատրաստ է փոխշահավետ հարաբերությունների ցանկացած երկրի հետ, այդ թվում՝ Գերմանիայի, որտեղ կառավարությունը փոխվում է։
«Եվ մենք պատրաստ ենք զարգացնել այս հարաբերություններն այնքան խորը և լայնորեն, որքան պատրաստ են այդ երկրներն իրենք», – նշել է Պուտինի մամուլի քարտուղարը։
ԱՄՆ առաջնորդն ավելի վաղ հայտարարել էր, որ կքննարկի Պուտինի հետ հնարավոր հանդիպումը Սաուդյան Արաբիայում՝ մայիսի կեսերին թագավորություն կատարելիք այցի ընթացքում։
Հիշեցնենք, որ Ուկրաինայի և Միացյալ Նահանգների միջև ընդերքի պաշարների վերաբերյալ համաձայնագրի ստորագրման մասին հայտնի է դարձել մայիսի 1-ին։ Ակնկալվում է, որ Գերագույն Ռադան փաստաթղթի վերաբերյալ քվեարկությունը կանցկացնի մայիսի 8-ին։ Ինչպես հայտնել է Ուկրաինայի առաջին փոխվարչապետ և էկոնոմիկայի նախարար Յուլիա Սվիրիդենկոն, փաստաթղթի համաձայն՝ Կիևը տարածքներում հանքանյութերի արդյունահանման նոր լիցենզիաներից և նոր վարձակալություններից ստացված բոլոր եկամուտների 50%-ը կհատկացնի ստեղծվող երկկողմ ներդրումային հիմնադրամին։ ԱՄՆ-ն և Ուկրաինան հավասար ձայներ կունենան հիմնադրամի կառավարման գործում։ Համաձայնագիրը չի նախատեսում Ուկրաինայի ուղղակի պարտքային պարտավորություններ Միացյալ Նահանգների նկատմամբ, ինչպես նաև չի պարունակում Վաշինգտոնի կողմից որևէ անվտանգության երաշխիքներ։
