Հնդկաստանը և Պակիստանը հայտարարում են հաղթանակի մասին, սակայն այս հակամարտությունը հաղթողներ չունի․ CNN

Հաղթանակը հազար հայր ունի, բայց պարտությունը որբ է։ Այսպես է CNN -ը բնութագրել միջուկային մրցակիցներ Հնդկաստանի և Պակիստանի միջև կարճատև, բայց դաժան հակամարտությունը, երբ երկու կողմերն էլ բարձրաձայն խոսում են իրենց հաջողությունների մասին՝ միաժամանակ լուռ նվազեցնելով պարտությունների նշանակությունը։

Հնդկաստանի լրատվական հաղորդումներում, ԱՄՆ-ի միջնորդությամբ կնքված հրադադարի ուժի մեջ մտնելուց մի քանի րոպե անց, էկրաններին հայտնվել է «Պակիստանը հանձնվում է» վերնագիրը։

Հնդկաստանի պաշտպանության նախարար Ռաջնաթ Սինգհն, իր հերթին, հայտարարել է, որ Հնդկաստանի ռազմական գործողությունները Պակիստանի դեմ, որոնք սկսվել էին անցյալ ամիս Հնդկաստանի կողմից կառավարվող Քաշմիրում զբոսաշրջիկների սպանությունից հետո, համարձակ ուղերձ էին ահաբեկիչներին։

Միևնույն ժամանակ՝ Պակիստանում ամբոխը հավաքվել էր մայրաքաղաքի փողոցներում՝ նշելու այն, ինչ վարչապետ Շեհբազ Շարիֆը նկարագրել էր որպես «ռազմական պատմություն», որը «մեր քաջարի բանակը» ձեռք է բերել տպավորիչ ձևով։

«Մի քանի ժամվա ընթացքում մեր ինքնաթիռները լռեցրին Հնդկաստանի զենքերն այնպես, որ պատմությունը շուտ չի մոռանա», – նշել է Շարիֆը, մինչ դրսում այրվում էր նրա հնդիկ գործընկերոջ խրտվիլակը։

Ինչպես գրել է CNN-ը, սա երկու միջուկային զենք ունեցող հարևանների միջև բռնության պոռթկում էր, որի ընթացքում երկու կողմերն էլ ծանր հարվածներ հասցրին և կրեցին։
Պակիստանը հայտարարել է երկնքում հաջողությունների մասին՝ պնդելով, որ իր օդաչուները օդային մարտերում խոցել են հինգ հնդկական կործանիչ, այդ թվում՝ երեք առաջադեմ ֆրանսիական արտադրության Rafale։

Ինչպես CNN-ն ավելի վաղ հաղորդել էր, երկու ինքնաթիռ վթարի է ենթարկվել Պակիստանին սահմանակից Հնդկաստանի նահանգներում մոտավորապես այն ժամանակ, երբ Պակիստանը հայտարարել էր, որ խոցել է ինքնաթիռները, իսկ ֆրանսիական հետախուզական աղբյուրը CNN-ին հայտնել է, որ Պակիստանը խոցել է առնվազն մեկ հնդկական Rafale։

Սակայն հնդիկ պաշտոնյաները դեռևս հրաժարվում են ընդունել նույնիսկ մեկ ինքնաթիռի կորուստը։

Միևնույն ժամանակ, Հնդկաստանը հրապարակել է նոր արբանյակային լուսանկարներ, որոնք ցույց են տալիս լուրջ վնասներ այն թռիչքուղիներում և ռադարային կայաններում, որոնք հնդիկ ռազմական պաշտոնյաների խոսքով՝ բազմաթիվ պակիստանյան ռազմական բազաներ են, որոնք վնասվել են հնդկական զանգվածային ավիահարվածներից։

Այլ կերպ ասած՝ Հնդկաստանի և Պակիստանի քաղաքական և ռազմական առաջնորդները կարող են իրավիճակը մեկնաբանել այնպես, ինչպես ցանկանում են, բայց այս հակամարտությունում հստակ հաղթող չկա։

Նույնիսկ դժվար է պատասխանատվություն կրել ԱՄՆ-ի միջնորդությամբ ակնհայտորեն իրականացված բանակցությունների համար, որոնք հանգեցրին հրադադարի, ինչի մասին գրեթե անսպասելիորեն հայտարարել է ԱՄՆ նախագահ Դոնալդ Թրամփը իր Truth Social հարթակում։
Շաբաթա վերջին արագ վատթարացող անվտանգության իրավիճակի ֆոնին, որը սպառնում էր դուրս գալ վերահսկողությունից, ԱՄՆ պետքարտուղար Մարկո Ռուբիոն նշել է, որ ինքը և փոխնախագահ Ջեյ Դի Վենսը զանգահարել են երկու կողմերի քաղաքական և ռազմական առաջնորդներին՝ կոչ անելով նրանց զսպվել։

Պակիստանի պաշտոնյաները երախտագիտություն են հայտնել միջամտության համար։ Սակայն Հնդկաստանի առաջնորդները թերագնահատում են ԱՄՆ-ի ցանկացած դեր՝ պնդելով, որ հրադադարը կնքվել է անմիջապես Հնդկաստանի և Պակիստանի միջև։

Պատճառը, հավանաբար, ազգային հպարտությունն է, քանի որ հնդիկ պաշտոնյաները դժկամությամբ են ընդունում, որ հրադադարը պարտադրվել է իրենց կամ նույնիսկ միջնորդվել է Միացյալ Նահանգների կողմից։

Հնդկաստանը նաև երկար ժամանակ որդեգրել է արտաքին միջնորդության մերժման քաղաքականություն, երբ խոսքը վերաբերում է մուսուլմանական մեծամասնությամբ Քաշմիրի կարգավիճակին, որը վիճելի տարածաշրջան է։

ԱՄՆ-ի միջնորդությամբ կնքված հրադադարն ընդամենը արագ լուծում է, միակողմանի օգնություն, որը, հավանաբար, չի լուծի Քաշմիրի կարգավիճակի շուրջ տասնամյակներ տևած վեճը բորբոքող հիմնարար դժգոհությունները։