ԱՄԷ-ն և Մոնղոլիան հունիսի 27-ին կստորագրեն ԵԱՏՄ համագործակցության մասին համաձայնագրերը

Արաբական Միացյալ Էմիրությունների և Մոնղոլիայի հետ ԵԱՏՄ-ի առևտրային համագործակցության մասին համաձայնագրերը նախատեսվում է ստորագրել հունիսի 27-ին Մինսկում, որտեղ տեղի կունենա միության գագաթնաժողովը. այս մասին հայտնել է Բելառուսի փոխարտգործնախարար Պավել Ուտյուպինը:

«Բելառուսի համար մեծ պատիվ է, որ ԵԱՏՄ-ի համար այնքան նշանակալի առևտրային գործընկերների հետ համաձայնագրերի ստորագրումը, ինչպիսիք են Արաբական Միացյալ Էմիրությունները և Մոնղոլիան, տեղի կունենա Մինսկում 2025 թվականի հունիսի 27-ին՝ Եվրասիական տնտեսական բարձրագույն խորհրդի նիստի ավարտից հետո»,-ասել է Ուտյուպինը:

2024 թվականին հաջողվել է ավարտին հասցնել Արաբական Միացյալ Էմիրությունների հետ տնտեսական գործընկերության մասին համաձայնագրի և Մոնղոլիայի հետ ժամանակավոր առևտրային համաձայնագրի կնքման շուրջ բանակցությունները։

«Տնտեսական գործընկերության մասին համաձայնագրի ուժի մեջ մտնելուց հետո ԵԱՏՄ-ի և ԱՄԷ-ի միջև կսկսի գործել ապրանքների ազատ առևտրի լիարժեք գոտին։ Մոնղոլիայի հետ ժամանակավոր առևտրային համաձայնագիրը կնքվում է երեք տարով՝ ևս երեք տարով երկարաձգումով և սահմանափակ ապրանքային ծածկույթով: Առաջին եռամյա ժամանակահատվածի ավարտից հետո կողմերը կսկսեն բանակցությունները լիաֆորմատ համաձայնագրի կնքման շուրջ, որը կհանգեցնի ազատ առևտրի գոտու ձևավորմանը»,-ասել է փոխնախարարը։