Փաշինյանի գործողությունները լուրջ հասարակական դժգոհություն են առաջացրել ոչ միայն Հայաստանում, այլև արտաքին ասպարեզում․ Regnum  

Հայաստանում հերթական քաղաքական սկանդալն է։ Բարերար Սամվել Կարապետյանի և երկրի առաջատար ընդդիմադիր գործիչներից մեկի՝ Բագրատ  արքեպիսկոպոս  Գալստանյանի ձերբակալությունից հետո, վարչապետ Նիկոլ Փաշինյանը երկու ամսով նախնական կալանքի է ուղարկել ևս մեկ արքեպիսկոպոսի՝ Հայ Առաքելական Եկեղեցու (ՀԱԵ) Շիրակի թեմի առաջնորդ Միքայել Աջապահյանին։ Եվ այդ ամենը նույն պատճառով՝ գործող կառավարությունը տապալելու կոչեր. գրել է Regnum-ը։

Ինչպես նշվել է, Փաշինյանի գործողությունները լուրջ հասարակական դժգոհություն են առաջացրել ոչ միայն Հայաստանում, այլև՝ արտաքին ասպարեզում: Արքեպիսկոպոս Միքայել Աջապահյանը քննադատել է երկրի ներկայիս ղեկավարներին, սակայն, միևնույն ժամանակ, չկան հեղաշրջման նախապատրաստման ապացույցներ, առավել ևս՝ Միքայել Աջապահյանի դրան մասնակցության մասին: Եվ, հետևաբար, շատերը քաղաքական ենթատեքստ են տեսնում Հայաստանի վարչապետի գործողություններում, ավելի ճիշտ՝ բազմաքայլ խաղ:

Այսինքն՝ այն հարցերը, որոնք Փաշինյանը միտումնավոր զոհաբերում է Ադրբեջանի և Թուրքիայի հետ հարաբերությունների կարգավորման համար։ Եվ քանի որ ՀԱԵ-ն հեղինակություն է վայելում հասարակության մեջ, նրա ձայնը պետք է լռեցվի, հատկապես հաշվի առնելով, որ մեկ տարի անց երկրում նախատեսված են խորհրդարանական ընտրություններ։ «Փաշինյանի եկեղեցու հետ հակամարտությունը նրա ռեժիմի և բնակչության պահպանողական մասի միջև հակամարտության մի մասն է, որը ցավոտ կերպով է ընկալում Ղարաբաղի կորուստը, Ադրբեջանին զիջումները և Փաշինյանի փաստացի պարտվողական կուրսը», – Regnum լրատվական գործակալության հետ զրույցում նշել է Եվրասիական վերլուծական ակումբի ղեկավար Նիկիտա Մենդկովիչը։

 Մյուս կողմից՝ ՀԱԵ-ն դեռևս լուրջ դիմադրություն չի ցուցաբերել Փաշինյանին։ Մասամբ՝ իր գաղափարախոսության պատճառով։ «Խնդիրն այն է, որ Հայաստանի բնակչությունը, դատելով ամեն ինչից, շատ անկազմակերպ է, ինքնությունը՝ թուլացած», – նշել է Մենդկովիչը՝ հավելելով, որ երկրում բնակչության այնպիսի ակտիվություն չկա, որը բավարար լիներ լայնածավալ բողոքի ցույցեր սկսելու համար։