Պառակտումը կտանի ինքնաոչնչացման․ հայտարարություն
Արցախում ստեղծված աղետալի իրավիճակում պետականության դեմ ուղղված
սպառնալիքը կարող է պայմանավորված լինել նաև ներքին հակասություններով, թշնամանքով
և պառակտումով, դրանք անթույլատրելի են և շատ արագ կտանեն պետության հիմքերի քայքայման
ու ինքնաոչնչացման․ ասված է «Արցախ հայրենասիրական կանչ» հասարակական կազմակերպության
տարածած հաղորդագրության մեջ։
Նշվում է, որ ստեղծված ծանր իրավիճակում ոչ թե ներքին հակասությունների,
անգամ արդարացի պահանջների լուծմամբ պետք է զբաղվել, այլ պետք է լինեն նպատակաուղղված
գործողություններ հայ ժողովրդի միասնականությամբ, միջազգային իրավունքի նորմերին համապատասխան
ինքնորոշման իրավունքի իրացման համար:
«Հորդորում ենք բոլորին՝ պետական այրերին, քաղաքական, հասարակական
ու ռազմական գործիչներին, լինել զգոն, հանդուրժող և ունեցած գիտելիքները, փորձը, ամբողջ
ներուժը ծառայեցնել միայն ու միայն ինքնորոշման իրավունքի իրացմանը»,-ասված է հայտարարության
մեջ:
ՀԿ-ն նշում է՝ ստեղծված ծանր իրավիճակում թշնամին նպատակադրվել
է լուծարել Արցախի պետական ինստիտուտները, կլանել Արցախը, բռնի կերպով հպատակեցնել
արցախցիներին, իրականացնել էթնիկ զտումներ:
