Բռունցքներ, թռչող շշեր ու վիրավորանքներ ԱԺ-ում. Քրեական հետապնդման հիմքը կա
ՔՊ–ականը սպառնում էր «վիզ պոկել», ընդդիմադիրները փորձում պաշտպանվել: Ծեծկռտուք բառը թերևս մեղմ բնութագրիչ է խորհրդարանի հուլիս 8-ի աշխատանքը նկարագրելու համար: Ազգային ժողովի նիստերի դահլիճում ոչ միայն խախտվեցին քաղաքական էթիկայի բոլոր սահմանները, այլև՝ ֆիզիկական անձեռնմխելիության սկզբունքը։ Բռունցքներ, սուր արտահայտություններ, վիրավորանքներ, քաշքշուկ, վերջում էլ՝ ՊՊԾ աշխատակիցներ: Եւ այս ամենը ուղիղ հեռարձակմամբ, քաղաքացիների աչքի առաջ։
Խորհրդարանում քննարկվում էր «Հայաստան» խմբակցության պատգամավոր Արթուր Սարգսյանի նկատմամբ քրեական հետապնդում սկսելու ու կալանավորելու դատախազի միջնորդությունը: Մեկ օր առաջ էլ նույն խմբակցության ղեկավարն ու քարտուղարը՝ Սեյրան Օհանյանն ու Արծվիկ Մինասյանն էին զրկվել անձեռնմխելիությունից, այժմ գործերն են պատրաստում քրեական հետապնդում հարուցելու համար: Իսկ վեճն ու քաշքշուկ հաջորդեցին Արթուր Սարգսյանի ելույթին:
