Ռուսաստանը չի պատրաստվում ստուգել Երևանի գրպանները. Զախարովա
ՌԴ ԱԳՆ խոսնակ Մարիա Զախարովան անդրադարձել է Եվրամիության կողմից Հայաստանին ֆինանսական օգնություն տրամադրելու ծրագրերին՝ նշելով, որ դա ներքաղաքական գործընթացների վրա ազդելու գործիք է եվրոպացիների ձեռքում.
«Դա բնորոշ է Եվրոպական հանձնաժողովի, ԵՄ-ի և ՆԱՏՕ-ին՝ շռայլ խոստումներ տալ, իսկ հետո այդ ֆինանսական խոստումների անվան տակ կոծկել գործընթացները՝ հանելով սերուցքը և ստանալով օգուտներ. ֆինանսատնտեսական օգնության տրամադրումը շուտվանից ազդեցության գործիք է դարձել Եվրամիության համար», – ասել է նա:
Զախարովայի խոսքով՝ այդ միջոցներն ուղղված են արևմտամետ ուժերի ֆինանսավորմանը երկրում:
Բացի այդ՝ նա հայտարարել է, որ ԵՄ-ն զանազան խարդախություններ է անում և խոստացած միջոցներից կա՛մ երկու անգամ քիչ գումար է տրամադրում, կա՛մ ոչինչ:
Միևնույն ժամանակ Զախարովան ընդգծել է, որ ՌԴ-ն չի պատրաստվում «մտնել Երևանի գրպանները», և ԵՄ-ից ստացված միջոցների վերաբերյալ հարցերը պետք է ուղղել Հայաստանին:
