Սկանդինավիայի հայերի միությունը Փաշինյանին կոչ է արել անհապաղ հրաժարական տալ
Հայ գործարար Սամվել Կարապետյանի անօրինական կալանքը վկայում է ՀՀ վարչապետ Նիկոլ Փաշինյանի աճող ավտորիտարիզմի մասին, որը փորձում է 2026-ի խորհրդարանական ընտրություններից առաջ «լռեցնել ընդդիմությանը». РИА Новости–ին հայտնել են Սկանդինավիայի հայերի միությունից։
«Մենք խորապես մտահոգված ենք հայտնի հայ բարերար և գործարար Սամվել Կարապետյանի դեմ քաղաքական դրդապատճառներով ձերբակալությամբ և անհիմն մեղադրանքներով։ Նրա անօրինական կալանքը վարչապետ Նիկոլ Փաշինյանի աճող ավտորիտարիզմի և այլախոհությունից նրա վախի հստակ օրինակ է։ Կարապետյանի դեմ գործը ոչ միայն ծիծաղելիորեն անհիմն է, այլև՝ ընդդիմությանը լռեցնելու և հանրությանը վախեցնելու հստակ փորձ է՝ 2026 թվականի ընտրություններից առաջ», – գործակալության հարցմանն ի պատասխան հայտնել է միության ներկայացուցիչը։ Նա հավելել է, որ իշխանությունների կողմից Հայ Առաքելական եկեղեցու (ՀԱԵ) վրա աճող ճնշումը նույնպես մտահոգիչ է Սկանդինավիայի հայերի համար։
«Այս հարձակումները Հայաստանի ամենահին հաստատության վրա ցույց են տալիս Փաշինյանի թշնամանքն իր վերահսկողությունից դուրս գտնվող ցանկացած ազդեցության կենտրոնի նկատմամբ։ Ի տարբերություն դրա՝ Սամվել Կարապետյանը մշտապես եղել է Եկեղեցու առատաձեռն բարերար՝ ֆինանսավորելով սրբավայրերի վերականգնումը և աջակցելով նրա մարդասիրական առաքելություններին, ինչը ևս մեկ անգամ ցույց է տալիս, թե ինչու է նա դարձել հասարակության անկախ սյուների նկատմամբ անհանդուրժող ռեժիմի թիրախը», – նշել է գործակալության աղբյուրը։
Նա հավելել է, որ Կարապետյանի՝ «Հայաստանի էլեկտրական ցանցեր» ընկերությունն ազգայնացնելու փորձերը, որոնք մերժվել են Ստոկհոլմի միջազգային արբիտրաժային դատարանի կողմից, ինչպես նաև «Տաշիր» ընկերությունների խմբի հետ կապված ձեռնարկությունների կամայական ստուգումներն ու փակումները ոչ միայն կործանում են երկրի տնտեսությունը, այլև իրականացվում են քաղաքական պատճառներով՝ «ամրապնդելով Փաշինյանի մենաշնորհային վերահսկողությունը հիմնական արդյունաբերությունների նկատմամբ»։
Սկանդինավյան հայերի միությունը կոչ է անում Փաշինյանին անհապաղ հրաժարական տալ՝ Արցախի հարցում Ադրբեջանին արված զիջումների արդյունքում այլախոհությունը ճնշելու և «արտաքին քաղաքականության մեջ աղետալի ձախողումների» պատճառով ։ «Այս զիջումները, զուգորդված նրա կառավարության ներքին ճնշումների հետ, թուլացրել են Հայաստանը թե՛ միջազգային, թե՛ ներքին մակարդակով։ Այս բացասական միտումը դադարեցնելու, օրենքի գերակայությունը վերականգնելու, հիմնարար ազատությունները պաշտպանելու և հայ ժողովրդի նկատմամբ վստահությունը վերականգնելու համար այժմ անհապաղ անհրաժեշտ է ղեկավարության փոփոխություն», – ընդգծել է աղբյուրը։
