Լոս Անջելեսի անտառային հրդեհները Ֆուկուսիմայից ի վեր ապահովագրական ընկերություններին ամենամեծ վնասներն են պատճառել

Հունվարին Լոս Անջելեսը պատուհասած անտառային հրդեհները կազմել են 2025 թվականի առաջին կեսին ապահովագրական բոլոր վնասների կեսը՝ գերազանցելով 2011 թվականին Ճապոնիայի Ֆուկուսիմա քաղաքում տեղի ունեցած աղետից հետո ապահովագրողների կրած վնասները. գրել է Bloomberg-ը՝ հղում անելով Munich Re-ի տվյալներին:

«Աշխարհում տեղի ունեցած բնական աղետները տարվա առաջին կեսին արդեն իսկ պատճառել են 80 միլիարդ դոլարի ապահովագրական վնաս, որոնցից 2025 թվականի առաջին շաբաթներին Լոս Անջելեսի տարածքում և շրջակայքում տեղի ունեցած հրդեհները կազմել են ընդհանուրի կեսը», – նշվել է զեկույցում։ Գործակալությունը ընդգծել է, որ նույնիսկ 2011 թվականին Ճապոնիայի Ֆուկուսիմա քաղաքում տեղի ունեցած երկրաշարժից և ցունամիից հետո ապահովագրական վնասները, որոնք հանգեցրին Ֆուկուսիմա-1 ատոմակայանի վթարին, այդքան բարձր չէին։ Munich Re-ի ներկայացուցիչը գործակալությանը հայտնել է, որ ընկերությունը 2025 թվականի երկրորդ կեսին ակնկալում է ավելի մեծ ապահովագրական վնասներ, քանի որ այս ժամանակահատվածը սովորաբար ավելի հարուստ է բնական աղետներով՝ Հյուսիսային Ամերիկայում փոթորիկների սեզոնի պատճառով։ Կալիֆոռնիայում հրդեհների վնասը գնահատվում է հարյուր միլիարդավոր դոլարներ։ Դրանք սկսվել են հունվարի 7-ին և համարվում են նահանգի պատմության մեջ ամենամեծը։ Իշխանությունների տվյալներով՝ հրդեհների տարածքը գերազանցել է 16 հազար հեկտարը։ Զոհվել է առնվազն 25 մարդ։ Օդերևութաբանները նշում են, որ հրդեհի արագ տարածումը պայմանավորված էր չոր և քամոտ եղանակով։