Չինաստանը «խեղդում է» արևմտյան պաշտպանական ընկերություններին՝ սահմանափակելով կարևորագույն հանքանյութերի մատակարարումը․ WSJ
Չինաստանը խիստ արտահանման սահմանափակումներ է սահմանել արևմտյան պաշտպանական ընկերությունների համար անհրաժեշտ հիմնական հանքանյութերի վրա՝ ստիպելով նրանց փնտրել երկրից դուրս այլընտրանքային աղբյուրներ. հաղորդում է Wall Street Journal-ը՝ հղում անելով ոլորտի ներկայացուցիչներին։
Հրատարակությունը նշել է, որ հազվագյուտ մետաղների և մագնիսների մատակարարումների կրճատումը հանգեցնում է զենքի և սարքավորումների արտադրության ուշացումների՝ զինամթերքից մինչև անօդաչու թռչող սարքեր և կործանիչներ։ Ամերիկյան անօդաչու թռչող սարքերի արտադրողներից մեկը ստիպված է եղել մի քանի շաբաթով հետաձգել պատվերները, մինչ փնտրում էր չինական բաղադրիչների փոխարինողներ։
Նշվել է, որ որոշ անհրաժեշտ նյութերի գները հնգապատիկ կամ ավելի բարձրացել են նախապատերազմյան մակարդակի համեմատ՝ Պեկինի կողմից սահմանված սահմանափակումների պատճառով։ ԱՄՆ զենքում օգտագործվող ավելի քան 80,000 մասեր պարունակում են հանքանյութեր, որոնք ընկնում են չինական արտահանման վերահսկողության տակ։ Միևնույն ժամանակ՝ գրեթե բոլոր մատակարարման շղթաները կախված են չինացի մատակարարներից, ինչը լուրջ ռիսկեր է ստեղծում ամերիկյան պաշտպանության համար։
Բացի այդ՝ չինական իշխանությունները պահանջում են, որ արևմտյան ընկերությունները մանրամասն տեղեկատվություն տրամադրեն գնված հանքանյութերի օգտագործման նպատակների մասին՝ դրանց օգտագործումը ռազմական ոլորտում կանխելու համար։
Ապրիլի սկզբին Չինաստանի Առևտրի նախարարությունը 16 ամերիկյան ընկերություն է ավելացրել արտահանման վերահսկողության ցանկին՝ սահմանափակելով կրկնակի նշանակության ապրանքների առաքումները: Ըստ New York Times-ի՝ Պեկինը կասեցրել է որոշ կարևորագույն հանքանյութերի և մագնիսների արտահանումը, որոնք անհրաժեշտ են մեքենաների, անօդաչու թռչող սարքերի, ռոբոտների և հրթիռների արտադրության համար։
Հունիսին Wall Street Journal-ը հաղորդել է, որ Չինաստանը մասամբ վերսկսել է հազվագյուտ մետաղների արտահանման լիցենզիաների տրամադրումն ամերիկյան ավտոարտադրողներին և արդյունաբերական ընկերություններին, սակայն թույլտվությունները սահմանափակված են վեց ամսով: Այնուամենայնիվ, ռազմական տեխնիկայի համար նախատեսված մասնագիտացված մագնիսների արտահանումը մնում է խիստ վերահսկողության տակ:
