Աղվան Արշակյանի պաշտպանական կողմը կդիմի ՄԻԵԴ
«Սրբազան պայքար» շարժման համակիր Աղվան Արշակյանի գործով կդիմեն Մարդու իրավունքների եվրոպական դատարան (ՄԻԵԴ)․ տեղեկությունը Sputnik Արմենիային հայտնեց նրա փաստաբան Վարազդատ Հարությունյանը։
«Կդիմենք ՄԻԵԴ, որովհետև իրավունքի պաշտպանության ներպետական մեխանիզմները չեն գործում»,– ասաց Հարությունյանը` պնդելով, որ իր պաշտպանյալի առողջական վիճակը կալանքի հետ անհամատեղելի է։
Աղվան Արշակյանի գործին ուղիղ եթերում անդրադարձել է նաև փաստաբան Ռուբեն Մելիքյանը և հիշեցրել, որ մինչև օրս չի կատարվել առողջական վիճակի հետ կապված փորձաքննությունը։
«Եթե անգամ այստեղ «խոշտանգում» տերմինը չենք կարող օգտագործել, ապա խոշտանգումից մի փոքր մակարդակով ցածր կա «անմարդկային վերաբերմունք» տերմինը։ Սա անմարդկային վերաբերմունք է։ Իրավապահները հերթական կարմիր գծերն են հատում։ Հավանական է, որ քննչական, դատախազական մարմինները գնացել, փորձել են վերադասների հետ այս հարցը կարգավորել, բայց վերևներում ինչ-որ մի տեղ չեն թողել։ Չգիտեմ՝ ինչքան վերևներում։ Վերևներում որոշել են տանջել 26-27 տարեկան էդ երեխուն», – ասել է Մելիքյանը։
Նա հավելել է, որ ՄԻՊ-ի աշխատակազմից այցելել և արձանագրել են, որ քաղցկեղով հիվանդ Արշակյանի ոտքն ու ձեռքը չեն աշխատում, նա չի կարող ինքնուրույն հոգալ իր կարիքները՝ առանց խցակիցների օգնության։ Բայց մինչ օրս փորձաքննություն չի իրականացվել, չնայած դատարանի համապատասխան որոշմանը։
