Իսրայելի ռազմաքաղաքական ղեկավարությունը համաձայնություն է տվել Գազայի ամբողջական բռնազավթմանը

Իսրայելի ազգային անվտանգության կոմիտեն համաձայնություն է տվել Գազայի նկատմամբ ամբողջական վերահսկողություն հաստատելու վերաբերյալ Բենիամին Նեթանյահուի ծրագրին. հայտնում է The Times of Israel-ը:

«Ազգային անվտանգության հարցերով նախարարական կոմիտեն հաստատել է ՀԱՄԱՍ խմբավորմանը լիակատար պարտության մատնելու վերաբերյալ վարչապետի առաջարկը. Իսրայելի պաշտպանության բանակը կպատրաստվի լիակատար վերահսկողություն հաստատելու Գազա քաղաքի նկատմամբ», – ասվում է հայտարարության մեջ։

Ըստ որոշման՝ նախատեսվում է նաև մարդասիրական օգնություն տրամադրել ռազմական գործողությունների շրջաններից դուրս գտնվող քաղաքացիական բնակչությանը:

Բացի այդ՝ Կոմիտեն ընդունել է հինգ սկզբունք, որոնք Իսրայելը կպահանջի պատերազմը դադարեցնելու դիմաց՝ Գազայի հատվածը կառավարող կազմակերպության զինաթափում, բոլոր 50 պատանդների վերադարձ, անկլավի ապառազմականացում, Իսրայելի կողմից Գազայի հատվածի անվտանգության նկատմամբ վերահսկողություն, ՀԱՄԱՍ-ից և Պաղեստինի ազգային ադմինիստրացիայից զատ՝ երրորդ այլընտրանքային կառավարության ձևավորում Գազայի հատվածում։