Վաշինգտոնում ՀՀ-ի և Ադրբեջանի միջև նախնական խաղաղության համաձայնագիրը կարող է և´ ստորագրվել, և´ ոչ. Պետդեպ
ԱՄՆ-ն հույս ունի, որ ՀՀ-ն և Ադրբեջանը շուտով որոշակի համաձայնության կհասնեն։ Այս մասին հայտարարել է ԱՄՆ Պետդեպի ներկայացուցիչ Թոմի Պիգոթը ճեպազրույցի ժամանակ։ Լրագրողի հարցին, թե Սպիտակ տանն արդյոք Ադրբեջանի և Հայաստանի առաջնորդների մասնակցությամբ կայանալիք եռակողմ գագաթնաժողովը կհանգեցնի՞ նախնական խաղաղության համաձայնագրի ստորագրմանը, և ի՞նչ դիրքորոշում ունի ԱՄՆ-ն «Զանգեզուրի միջանցքի» վերաբերյալ, պաշտոնյան պատասխանել է․
«Երկրորդ կետի վերաբերյալ թույլ տվեք տեսնել, թե կարո՞ղ եմ ձեզ ավելի շատ մանրամասներ տրամադրել։ Առաջին կետի վերաբերյալ մանրամասնել ստանալու համար հարկավոր է դիմել Սպիտակ տուն։ Դա կարող է տեղի ունենալ կամ` ո՛չ», – նշել է Պիգոթը։
Լրագրող է նաև հետաքրքրվել է այս հարցում Թուրքիայի դերով՝ նշելով, որ Թուրքիայի նախագահ Էրդողանը վերջերս առանձին-առանձին հանդիպել է ինչպես Հայաստանի, այնպես էլ Ադրբեջանի առաջնորդների հետ։
Պիգոթն ընդգծել է․ «Ես կարող եմ ասել այն, ինչ և՛ նախագահը, և՛ պետքարտուղարը ասել են․ մենք հույս ունենք, ընդհանուր առմամբ, շուտով որոշակի համաձայնության հասնել։ Նրանք երկուսն էլ դա բազմիցս ասել են։ Հնարավորության դեպքում՝ պետքարտուղարը հաճախ է խոսում այս մասին։ Երբ հայտարարելու բան լինի, մենք կհայտարարենք դրա մասին»։ Նա հավելել է, որ այս պահին չի պատրաստվում ենթադրություններ անել կամ առաջ անցնել այդ հայտարարություններից։
