Ռուսաստանը մնացել է մի կողմում, քանի որ Կրեմլը ոչինչ չունի առաջարկելու Հայաստանին և Ադրբեջանին. փորձագետ
Նախագահ Դոնալդ Թրամփը հայտարարել է, որ Հայաստանի և Ադրբեջանի առաջնորդներն ուրբաթ Սպիտակ տանը կստորագրեն խաղաղության համաձայնագիր, որը կարող է վերջ դնել տասնամյակներ տևած հակամարտությանը։ Ըստ The Washington Post-ի աղբյուրների՝ համաձայնագրերը ներառում են մեծ առաջընթաց՝ տարածաշրջանում հիմնական տարանցիկ միջանցքի ստեղծման վերաբերյալ, որը խոչընդոտ էր խաղաղաության համաձայնագրի ստորագրման համար։ Ինչպես նշվել է, Ադրբեջանը չի վստահում Հայաստանին, այսպես կոչված, «Զանգեզուրի միջանցքի» վերահսկողության հարցում, մինչդեռ Հայաստանը կտրականապես դիմադրել է երրորդ կողմի վերահսկողությանն՝ այն համարելով իր ինքնիշխանության խախտում։
«Պարզ չէ, թե ինչպես է այդ դիմադրությունը հաղթահարվել համաձայնագրում», – գրել է The Washington Post-ը։
Ինչպես նշվել է, Ռուսաստանը, որն ունի ռազմական բազա Հայաստանում, նախկինում առաջարկել էր իր զորքերը տեղակայել միջանցքն ապահովելու համար։ Հայաստանը, որը վճռականորեն տրամադրված էր կրճատել կապերը Ռուսաստանի հետ՝ Արևմուտքի հետ ավելի սերտ հարաբերություններ հաստատելու համար, մերժել է այդ գաղափարը։
«Ռուսաստանը մնացել է մի կողմում, քանի որ Կրեմլը ոչինչ չունի առաջարկելու Հայաստանին և Ադրբեջանին», – պարբերականի հետ զրույցում նշել է Հարավային Կովկասի հարցերով փորձագետ Օլեսյա Վարդանյանն՝ ընդգծելով, որ Մոսկվայի տարածաշրջանային ազդեցությունը նվազել է Ուկրաինայի պատերազմի վրա կենտրոնանալուց հետո։
«Ռուսաստանն այժմ ռեսուրսներ չունի Հայաստանի և Ադրբեջանի հետ գործ ունենալու համար», – նշել է Վարդանյանը։
Թուրքիան հեռանկարային համաձայնագիրը դիտարկում է որպես Հարավային Կովկասում իր ազդեցությունը ընդլայնելու ջանքերի մի մաս, մինչդեռ Հայաստանը սահմանի վերաբացումը և Թուրքիայի հետ առևտրի վերսկսումը համարում է գերակա խնդիր։ Փաշինյանը, որը հունիսին այցելել է Թուրքիա, Անկարայի հետ հարաբերությունների կարգավորումը դարձրել է իր գլխավոր նպատակը։
