Թուրքիայի կառուցողական ներգրավվածությունը մեծ նշանակություն կունենա Վաշինգտոնում գրանցված առաջընթացի ամրապնդման համար. ԵԽ պատգամավորներ
Եվրախորհրդարանի պատգամովերների խումբ հանդես է եկել համատեղ հայտարարությամբ՝ ողջունելով ՀՀ-ի և Ադրբեջանի միջև ձեռք բերված պայմանավորվածությունները.
«Բարձր ենք գնահատում Հայաստանի և Ադրբեջանի կառավարությունների վճռականությունը՝ դադարեցնելու երկարատև հակամարտությունը, ինչպես նաև այդ հարցում Միացյալ Նահանգների նշանակալի ներդրումը, որը հիմնված է վերջին տարիներին այդ թվում՝ ԵՄ միջնորդությամբ տեղի ունեցած բանակցությունների վրա»,- ասվում է հայտարարության մեջ։
Պատգամավորները կոչ են արել առաջիկայում ստորագրել խաղաղության համաձայնագիրը:
«Երկու երկրների միջև ներքին, երկկողմ և միջազգային փոխադրումների համար հաղորդակցությունների բացման մասին քաղաքական համաձայնությունը, որը հիմնված է պետությունների ինքնիշխանության, տարածքային ամբողջականության և իրավազորության սկզբունքների վրա, կարևոր առաջընթաց է։ Ընդգծում ենք երկրի հարավով երթուղու զարգացման և կառավարման հարցում Միացյալ Նահանգների և երրորդ կողմերի հետ գործակցելու՝ Հայաստանի մտադրությունը, ողջունում ենք ներդրումներ կատարելու՝ Միացյալ Նահանգների պատրաստակամությունը։ Այս կարևորագույն նախագծի իրականացումը կբացահայտի Հարավային Կովկասի հսկայական ներուժը: Տարածաշրջանը կդառնա առևտրի և տնտեսական բարգավաճման կենտրոն՝ փոխադարձաբար օգուտ բերելով բոլոր երկրներին»,- նշել են պատգամավորները:
Եվրոպացի պաշտոնյաները նաև կոչ են արել լուծել Ադրբեջանում ապօրինաբար պահվող հայ ռազմագերիների և Արցախից տեղահանված հայերի հարցը:
Բացի այդ՝ Եվրախորհրդարանի պատգամավորները նշել են, որ Թուրքիայի «կառուցողական ներգրավվածությունը» մեծ նշանակություն կունենա Վաշինգտոնում գրանցված առաջընթացի ամրապնդման համար։
