Թեհրանը հույս ունի հասնելու հուսալի մեխանիզմի «Թրամփի խաղաղության ճանապարհի» վերաբերյալ․ Արաղչի
Իրանի դիվանագիտության ղեկավար Աբբաս Արաղչին IRNA լրատվական գործակալության հետ զրույցում նշել է, որ «Իրանի Իսլամական Հանրապետությունը չի հանդուրժի տարածաշրջանի աշխարհաքաղաքական սահմանների փոփոխությունները»։ Նրա խոսքով՝ այս հարցն «անպայման կքննարկվի» Իրանի նախագահի՝ Հայաստան այցի ժամանակ։ «Մենք կրկին կբարձրաձայնենք մեր մտահոգությունները, որոնց մասին, իհարկե, մեր հայ ընկերները տեղյակ են, և մենք կփորձենք այս հարցում հուսալի մեխանիզմի գալ», – հավելել է նա։
Արաղչին խոսել է Իրանի նախագահի՝ Հայաստանում կայանալիք բանակցությունների հիմնական թեմաների մասին։ Նա նշել է, որ Թեհրանը մտահոգություն է հայտնել «Թրամփի խաղաղության ճանապարհ» անունով հայտնի նոր տրանսպորտային երթուղու վերաբերյալ, որը նախատեսվում է կառուցել Հայաստանի տարածքով՝ Ադրբեջանի Հանրապետությունը Նախիջևանի Ինքնավար Հանրապետության հետ կապելու համար։ Նախարարը հույս է հայտնել, որ «մենք այս հարցում նույնպես հուսալի մեխանիզմի կհասնենք»։
Արաղչին նաև ընդգծել է Իրանի և Հայաստանի միջև ավանդական և մշակութային համագործակցության կարևորությունը։ «Մեր հարաբերությունները Հայաստանի հետ շատ երկարատև և սերտ են, և իրանական ընկերությունները ներգրավված են այս երկրում խոշոր նախագծերում»,- նշել է նա։ Նախարարը նաև հավելել է, որ «Հայաստանում ավելի քան 3000 ուսանողներ ուսումնասիրում են պարսկերեն»։ Անդրադառնալով տարածաշրջանային հարցերին՝ նա ընդգծել է. «Մեր հիմնական մտահոգությունն աշխարհաքաղաքական փոփոխություններն են. մենք չենք ընդունում հայտնի սահմանների փոփոխությունը, դրանց տեղաշարժը կամ տարածաշրջանի երկրների ինքնիշխանության և տարածքային ամբողջականության թուլացումը»։ Նա հղում է արել Հայաստանի և Ադրբեջանի միջև պաշտոնական հայտարարությանը, որը վերահաստատել է «տարածաշրջանի սահմանների անփոփոխությունը», «ինքնիշխանության և տարածքային ամբողջականության նկատմամբ հարգանքը» և «այդ սահմանները փոխելու մտադրության բացակայությունը», սակայն հավելել է, որ Իրանը ուշադիր կհետևի այս զարգացումներին։
