Ռոբերտ Քոչարյանի գլխավորությամբ մասնակցելու ենք 2026 թվականի ընտրությանը․ Լևոն Քոչարյան

Ոչ մեկի համար գաղտնիք չէ, որ դատավորների մի մասը պատրաստ է իրականացնել արդարադատություն, իսկ մյուսներն ավելի շատ ենթարկվում են իշխանությունների ցանկություններին․ լրագրողների հետ զրույում ասել է «Հայաստան» խմբակցության պատգամավոր Լևոն Քոչարյանը։ Նա հավելել է, որ վերջին տարիներին բազմաթիվ բացահայտումներ և քրեական գործեր ցույց են տվել այն անարդար պրակտիկաները, որոնք օգտագործվել են ընդդիմադիր գործիչների դեմ։

Քոչարյանը նշել է, որ հասարակական ճնշման բացակայությունը հեշտացրել է իշխանությունների համար իրենց գործողությունները ներկայացնել ընդունելի։ Միայն զանգվածային բողոքներ կարող են կրճատել ապօրինությունները՝ նշել է Քոչարյանը։

«Եթե հասարակությունը միավորվեր, ընդդիմադիր ուժերը կարող էին ցույց տալ, որ նման գործելակերպը չի կարող անպատիժ մնալ»,- ընդգծել է նա։

Նա անդրադարձել է նաև առաջիկա ընտրություններին.  «Մենք երբեք չենք փակել փողոցային պայքարի հնարավորությունը, բայց ընտրությունները անպայման տեղի կունենան, և մեր հիմնական ընդդիմադիր ուժը՝ Ռոբերտ Քոչարյանի գլխավորությամբ, պատրաստ է արդյունավետ մասնակցել», -ասել է Քոչարյանը։