Մարդկանց դուր է գալիս, թե ոչ՝ ՌԴ-ն հզոր երկիր է, և Զելենսկին պետք է ճկունություն ցուցաբերի․ Թրամփ
«Իմ նախագահության ընթացքում Ուկրաինայում ամերիկյան զորքեր չեն լինի», – ԱՄՆ նախագահ Դոնալդ Թրամփն այս մասին հայտարարել է Fox News–ին տված հարցազրույցում։ Այնուամենայնիվ, նա նշել է, որ Ուկրաինային կտրամադրվի անվտանգության որոշակի երաշխիքներ։ Թրամփն ընդգծել է, որ ԱՄՆ–ն պատրաստ է օգնություն ցուցաբերել այս հարցում։ Նա հավելել է, որ Ֆրանսիան, Գերմանիան և Մեծ Բրիտանիան ցանկանում են իրենց զորքերը տեղակայել Ուկրաինայի տարածքում։ Թրամփը նաև նշել է, որ չի պլանավորում մասնակցել Պուտինի և Զելենսկիի առաջին հանդիպմանը։ Նրա խոսքով՝ բանակցություններում որոշումները կկայացնեն երկու երկրների ղեկավարները․ Միացյալ Նահանգները հեռու է հակամարտությունից։ «Զելենսկին պետք է ճկունություն ցուցաբերի։ Կարող է համաձայնություն լինել, կարող է չլինել։ Կտեսնենք առաջիկա 2-3 շաբաթվա ընթացքում», – նշել է Թրամփը։
Նրա խոսքով՝ Սպիտակ տանը կայացած հանդիպման ժամանակ եվրոպացի առաջնորդներն ըմբռնումով էին մոտենում Ուկրաինայի կողմից տարածքային հարցերում զիջումների գնալու անհրաժեշտությանը։ Միևնույն ժամանակ ԱՄՆ առաջնորդը հավելել է, որ Ուկրաինան շատ հող կստանա։ «Ուկրաինան կստանա փրկարար բաճկոն, և նրանք շատ հող կստանան։ Բայց սա պատերազմ է, և Ռուսաստանը ուժեղ երկիր է։ Անկախ նրանից, թե մարդկանց դուր է գալիս, թե ոչ, այն հզոր երկիր է։ Այն շատ ավելի մեծ է», – նշել է նա։ Թրամփն ընդգծել է, որ Ղրիմը Ուկրաինային վերադարձնելը, ինչպես նաև Կիևի ՆԱՏՕ–ին անդամակցելը անհնար է։
