Նիկոլ Փաշինյանն ու Ալիևը սպասարկում են ադրբեջանական շահերը․ ադրբեջանագետը՝ Ալիևի հայտարարության մասին
Ադրբեջանագետ Արմինե Ադիբեկյանն ABC media-ի հետ զրույցում անդրադարձել է Ադրբեջանի նախագահի հայտարարություններին, որտեղ վերջինս նշել է, թե պետք է պատրաստ լինել նոր հակամարտության։ Մասնագետը կարծում է, որ խոսքը իրանա-իսրայելական հակամարտության մասին է, որտեղ Ադրբեջանն անկախ իր կամքից պետք է ներգրավվածություն ունենա։
«Ինձ թվում է Ալիևը ի նկատի ունի Իրանի շուրջ զարգացումները, և բնական է, որ նա այդ պատերազմը բաց չի թողնի և կօգտագործի Հայաստանի դեմ ռազմական գործողություններ ծավալելու համար»,-ասել է Ադիբեկյանը։
Իսկ Նիկոլ Փաշինյանի հայտարարությունը, թե ռազմական ոլորտում ծախսերը չեն ավելանալու, Ադիբեկյանը բացատրում է այսպես․
«Փաշինյանը խաղաղությամբ փորձում է քողարկել այն, որ Հայաստանի Հանրապետության բյուջեն այն աստիճանի է սնանկացել, որ ռազմական ծախսերի հնարավորություն, էլ չեմ ասում աճեցնելու, առհասարակ ծածկելու Հայաստանի Հանրապետության ռազմական ծախսերը, ոչ մի հնարավորություն չկա, և դա նա փորձում է մեզ մատուցել որպես խաղաղության պատրաստվելու միջոց։ Եվ այստեղ ես ոչ մի տարաձայնություն չեմ տեսնում Ալիևի և Փաշինյանի միջև, որովհետև Ալիևը լուծում է Ադրբեջանի խնդիրները և խոսում է Ադրբեջանի շահերից, Փաշինյանը կրկին խոսում է Ադրբեջանի շահերից, հետևաբար՝ Ալիևը խոսելով Ադրբեջանի շահերից զինում է Ադրբեջանը, իսկ Փաշինյանը՝ խոսելով Ադրբեջանի շահերից զինաթափում է Հայաստանը։ Ամեն ինչ գալիս, տեղն է ընկնում»,- նշել է Ադիբեկյանը։
