Կործանարար հարձակումներ Գազայում. Իսրայելն ավերել է ավելի քան 1000 շենք

Իսրայելը Գազայի Զեյթուն և Սաբրա թաղամասերում ամբողջությամբ ոչնչացրել է ավելի քան 1000 շենք՝ սկսած օգոստոսի 6-ին քաղաքի ներխուժումից. հայտնում է Al Jazeera-ն:

Պաղեստինի Քաղաքացիական պաշտպանության ծառայության հաղորդմամբ՝ հարյուրավոր մարդիկ դեռ գտնվում են ավերակների տակ։

Ծառայությունը կիրակի տեղեկացրել է, որ շարունակվող հրետակոծությունն ու փակ ճանապարհները խոչընդոտում են փրկարարական ու մարդասիրական գործողություններին։ Շտապօգնության աշխատակիցները ստանում են բազմաթիվ հաղորդումներ անհետ կորածների մասին, սակայն չեն կարող արձագանքել, իսկ հիվանդանոցները ծանրաբեռնված են հարձակումների հետևանքով։

«Գազայի գոտում չկա որևէ ապահով վայր՝ ո՛չ հյուսիսում, ո՛չ հարավում։ Հրետակոծվում են թե տները, թե ապաստարանները և նույնիսկ տեղահանվածների ճամբարները», – նշել է Քաղաքացիական պաշտպանության ծառայությունը։

Իսրայելական տանկերը մտել են Սաբրա թաղամաս՝ նպատակ ունենալով ամբողջությամբ գրավել Գազայի հատվածը, ինչի հետևանքով մոտ մեկ միլիոն պաղեստինցի ստիպված շարժվել է հարավ։ Քաղաքացիական պաշտպանության պնդումները հաստատում են այն մտավախությունները, որ Իսրայելը պատրաստվում է ամբողջությամբ ավերել Գազան, ինչպես արեց Ռաֆայում։ Մարդու իրավունքների պաշտպանները պնդում են, որ այս գործողությունը կարող է նպատակ ունենալ ամբողջությամբ դուրս մղել պաղեստինցիներին Գազայից։

Վերջին հարձակումներից մեկի հետևանքով, որը Իսրայելը իրականացրել է Գազայի ալ-Ջալաա փողոցի բնակելի շենքի վրա, սպանվել է առնվազն երեք մարդ, այդ թվում՝ մեկ երեխա։ Տարածքը, որտեղ արդեն սով է հայտարարվել, վերջին շաբաթներին ենթարկվում է անդադար հրետակոծությունների։ Բնակիչները հայտնում են, որ պայթյունները չեն դադարել, իսկ հյուսիսում՝ ավերված Ջաբալիայի փախստականների ճամբարում ևս մի քանի շենք է պայթեցվել։