Ժնևում կայացել է Իրանի միջուկային ծրագրի շուրջ բանակցությունների հերթական փուլը
Ժնևում ավարտվել է Իրանի և եվրոպական երեք պետությունների՝ Մեծ Բրիտանիայի, Գերմանիայի և Ֆրանսիայի միջև միջուկային բանակցությունների հերթական փուլը:
Խորհրդակցություններից հետո Իսլամական Հանրապետության փոխարտգործնախարար Քազեմ Ղարիբաբադին հայտարարել է, որ Իրանը շարունակում է մնալ դիվանագիտության և վիճելի հարցերի փոխշահավետ լուծման կողմնակից.
«Երկու կողմերն էլ ներկայացրել են իրենց տեսակետները 2231 բանաձևի վերաբերյալ: Իրանը շարունակում է հավատարիմ մնալ դիվանագիտությանը և փոխշահավետ լուծում գտնելուն: Ժամանակն է, որ եվրոպական եռյակը և ՄԱԿ-ի Անվտանգության խորհուրդը կատարեն ճիշտ ընտրություն՝ ժամանակ տալով դիվանագիտությանը», – գրել է Ղարիբաբադին X-ում։
Արտաքին գործերի գործակալությունների ղեկավարների տեղակալների մակարդակով հանդիպման ժամանակ քննարկվել է եվրոպական եռյակի պահանջը, որի համաձայն՝ Իրանը պետք է վերականգնի ԱԷՄԳ (ՄԱԳԱՏԷ) տեսուչների մուտքը իր միջուկային օբյեկտներ, նաև վերսկսի դիվանագիտական բանակցությունները՝ իրանական միջուկային ծրագրի վերաբերյալ նոր համաձայնագրի հասնելու համար:
Հակառակ դեպքում եվրոպական տերությունները սպառնում են վերականգնել 2015 թվականի համաձայնագրով չեղարկված պատժամիջոցները:
«Կտեսնենք, թե արդյոք իրանցիները վստահելի՞ են գործարքի երկարաձգման հարցում, թե՞ խաբում են մեզ։ Մենք ցանկանում ենք հասկանալ, թե փոխվե՞լ է արդյոք նրանց դիրքորոշումը երկարաձգման համար սահմանված պայմանների հարցում», – ասել է Reuters-ին եվրոպացի պաշտոնյաներից մեկը։
