Միջազգային դատական ատյաններում ՀՀ ներկայացուցչին ազատելը ևս Բաքվի պահանջն էր. ադրբեջանագետ
Հայաստանի Հանրապետությունը ոչ միայն համաձայն է, այլ նաև կյանքի է կոչել Ադրբեջանի պահանջները. ABC media-ի հետ զրույցում ասել է ադրբեջանագետ Արմինե Ադիբեկյանը՝ մեկնաբանելով Ադրբեջանի ԱԳ նախարար Ջեյհուն Բայրամովի հայտարարությունն այն մասին, որ հունվարին Հայաստանը դեմ է եղել ադրբեջանական 2 նախապայմաններին:
«Նիկոլ Փաշինյանը թափանցիկ է դարձրել երկրի սահմանները՝ քանդելով ՀՀ բանակը: Սրանից ավելի ինչպե?ս կարող էր Փաշինյանը բավարարել ադրբեջանական կողմի պահանջները: Չկա ոչ մի պայման, որ հնչել է Բաքվից և Փաշինյանի կողմից չի իրականացվել»,- ասել է ադրբեջանագետը:
Ադրբեջանագետի խոսքով՝ միջազգային դատական ատյաններում ներկայացուցչին ազատելը ևս Բաքվի հրահանգով է արվել:
«Եղիշե Կիրակոսյանին աշխատանքից ազատելը և այն, որ Հայաստանը պետք է հրաժարվի միջազգային դատական հայցերից, Ալիևի պահանջն է եղել, որը հայկական կողմը բավարարել է»,- ասել է Ադիբեկյանը:
Հիշեցնենք, որ Բայրամովը հայտարարել էր, թե Հայաստանը մինչև 2025 թվականի հունվար չի համաձայնել խաղաղության պայմանագրի որոշ դրույթերի հետ: Մասնավորապես դեմ է եղել այն կետերին, որոնք վերաբերել են դատարաններում հայցերի հետկանչմանը և սահմանին երրորդ ուժերի տեղակայմանը: Նրա խոսքով՝ հայկական կողմի դիրքորոշումը փոխվել է ԱՄՆ-ում Դոնալդ Թրամփի վարչակազմի իշխանության գալուց հետո։
«ԱՄՆ կատարած այցի ընթացքում Դոնալդ Թրամփի ներկայությամբ Ադրբեջանի և Հայաստանի ղեկավարների կողմից ստորագրված համատեղ հռչակագիրը հաստատում է Ադրբեջանի օրակարգը», – պնդել է Ադրբեջանի արտգործնախարարը՝ հիշեցնելով Բաքվի մյուս պահանջի մասին՝ Ադրբեջանն ակնկալում է, որ Երևանը կփոխի Սահմանադրությունը։
