«Հայաստանի պատմություն» դասագրքում կուսակցական քարոզ չկա․ Ժաննա Անդրեասյանի ասուլիսը՝ կետերով
«Հայոց պատմություն» չունենք, «Հայաստանի պատմություն» է. Ժաննա Անդրեասյանը հունից դուրս է եկել մամուլի ասուլիսի ժամանակ։ Անդրեասյանի ասուլիսի հիմնական կետերը ներկայացնում ենք ստորև․
- «Հայաստանի պատմություն» դասագրքում կուսակցական քարոզ չկա։ Խորհուրդ եմ տալիս վերհիշել մինչև 2018 թվականը Հայաստանի դպրոցներում տիրող իրավիճակը, երբ բոլոր տնօրենները «թաթախված էին քաղաքականության մեջ»։
- Բուհերում 2025–26 ուսումնական տարվա ընդունելության արդյունքներով թափուր տեղերի թիվը 5 անգամ կրճատվել է նախորդ տարվա հետ համեմատ։ Եթե 2024 թ–ին թափուր էր մնացել 6174 տեղ, ապա այս տարվա ցուցանիշներով թափուր մնացած տեղերը 1174 է, անվճար կամ պետության փոխհատուցմամբ թափուր տեղերի թիվը` 219։
- Սեպտեմբերի 1–ից առաջին դասարանցիները կսովորեն նոր Այբբենարանով։ Այս տարի կրթական նոր չափորոշիչով ենք աշխատելու առաջին դասարաններում։ Ուսուցման մեթոդներում նորություններ են առաջարկված։
- 5-12-րդ դասարանի երեխաների համար դասագրքերի վարձավճարներից 3,000 դրամ հետ կվերադարձվի ծնողներին, եկամուտների համընդհանուր հայտարարագիրը լրացնելու դեպքում։
- Ցեղասպանության հուշահամալիրի ու թանգարանի վերանորոգման համար պետությունը հատկացրել է շուրջ 800 միլիոն դրամ։ Թե՛ հուշահամալիրը, թե՛ թանգարանը ամբողջությամբ նույն տեսքով վերականգնվելու են անհրաժեշտ աշխատանքներից հետո:
- Հաշվի առնելով, որ առաջիկայում մեզ սպասվում են ընտրություններ, այս առիթն օգտագործելով ուզում եմ հայտարարել՝ կրթության ոլորտի մարդիկ պետք է կրթական հաստատություններում զբաղվեն կրթության գործընթացով և ցանկացած բան, որը խաթարելու է այս տրամաբանությունը, ստանալու է շատ խիստ հակազդեցություն, ընդհուպ մինչև այդ մարդկանց ազատում:
