Կործանարար հարվածներ Գազայում. առնվազն 61 զոհ կա

Իսրայելական հարձակումների հետևանքով առավոտից Գազայում առնվազն 61 մարդ է զոհվել. գրում է Al Jazeera-ն, հղում անելով բժշկական աղբյուրներին։ Տեղի բնակիչները հաղորդում են, որ ռմբակոծությունները հատկապես ինտենսիվ են եղել Գազայի արևելյան և հարավային թաղամասերում։

Իսրայելի բանակը պատրաստվում է գրավել Գազան, որն անկլավի ամենամեծ քաղաքային կենտրոնն է։ Միջազգային հանրությունը, սակայն, կոչ է անում դադարեցնել այս քայլը՝ զգուշացնելով մեծաթիվ զոհերի և մոտ մեկ միլիոն պաղեստինցիների տեղահանության վտանգի մասին։

ՄԱԿ-ի գլխավոր քարտուղար Անտոնիո Գուտերեշը քննադատել է գործողությունները՝ հայտարարելով, որ դրանք «պատերազմի նոր և վտանգավոր փուլ» են։

«Ռազմական գործողությունների ընդլայնումը Գազայում աղետալի հետևանքներ կունենա։ Հարյուր հազարավոր խաղաղ բնակիչներ, որոնք արդեն հոգնած են ու բազմաթիվ վնասվածքներ ունեն, կրկին հարկադրված կլինեն փախչել՝ ավելի մեծ վտանգի առաջ կանգնելով»,- ասել է Գուտերեշը՝ ընդգծելով, որ պետք է պատասխանատվություն լինի «սարսափների անվերջանալի շարանի» համար։

«Սա պետք է դադարի։ Այնտեղի «աղետը» բխում է այն որոշումներից, որոնք հակասում են մարդկային հիմնական արժեքներին», – հավելել է նա։

Գազայի բնակիչները հայտնել են, որ ընտանիքները լքում են իրենց տները և շարժվում դեպի ծովափ, քանի որ իսրայելական ուժերը ռմբակոծում են Շուջայիա, Զեյթուն և Սաբրա թաղամասերը։

Գազայի քաղաքացիական պաշտպանության տվյալներով՝ Զեյթունի հարավային մասում ոչ մի շենք կանգուն չի մնացել․ իսրայելական ցամաքային գործողությունների հետևանքով ավերվել է ավելի քան 1,500 տուն։

Իսրայելի պաշտոնյաները Գազան նկարագրում են որպես «ՀԱՄԱՍ-ի վերջին հենակետ»։