Լիդյա Մանթաշյանի բաց նամակը՝ «Աբովյան» ՔԿՀ-ից
«Սրբազան պայքարի» ակտիվիստ, այժմ կալանավորված Լիդյա Մանթաշյանը «Աբովյան» ՔԿՀ-ից նամակ է հրապարակել, որտեղ անդրադառնում է իր կալանքի պայմաններին և Հայաստանում արդարության նկատմամբ իր մտահոգություններին։
«Դատարանում տեսարանը շատ նման էր մեր Տիրոջ՝ Հիսուս Քրիստոսի կյանքի վերջին օրերին, երբ քահանայապետերը փորձում էին գեթ մեկ զրպարտություն գտնել Հիսուսի դեմ, բայց ապարդյուն, որովհետև Հիսուսի դեմ տրված ցուցմունքները հակասում էին մեկը մյուսին։ Այսպես է այսօր նաև Հայաստանում»,- գրել է Մանթաշյանը:
Նա նշել է, որ արդեն ավելի քան երկու ամիս է, ինչ ինքն ու ևս 17 անձ կալանքի տակ են պահվում՝ «չկատարած հանցանքների» համար։ Նա իր անցած ճանապարհը համեմատում է Հիսուս Քրիստոսի կյանքի վերջին օրերին տեղի ունեցած դեպքերի հետ՝ նշելով, որ դատարանում տրված ցուցմունքները հակասել են միմյանց։
«Մեզ կալանավորել են, որպեսզի պատժեն ու հալածեն, սակայն իրականում այսօր Հայաստանում մեզնից զատ հալածվում է արդարությունը», – ընդգծել է Լիդյա Մանթաշյանը։ Նա նաև գրել է, որ քրիստոնյաները պատրաստ են հալածվելու ճշմարտության և արդարության համար, ուստի իրենք՝ 18 «մեղադրյալներն» էլ, հոժարությամբ են ընդունել այս փորձությունը։
Նամակի վերջում Լիդյա Մանթաշյանը մեջբերում է Սուրբ Հովհաննես Ոսկեբերանի խոսքերը․
«Փառք Քեզ, Աստուած, Փառք Քեզ, Յաղագս Ամենայնի, Տեր, Փառք Քեզ»։
