Նարեկ Կարապետյանը հայտարարել է «Մեր ձևով» կամավորական շարժման ստեղծման մասին. երկրորդ փուլում այն կուսակցություն կդառնա
«Մեր ձևով» շարժման համակարգող Նարեկ Կարապետյանն, այսօր, մամուլի ասուլիսի ժամանակ հայտարարել է կամավորական շարժման ձևավորման մասին՝ ընդգծելով, որ երկրորդ փուլում այն կուսակցություն կվերածվի։
Իր խոսքի սկզբում Կարապետյանը նշել է, որ Հայաստանի հասարակական ու քաղաքական կյանքում հասել ենք մի հանգրվանի, երբ հասարակության սպասելիքները այլևս չեն բավարարվում։
«Այսօր գործող հասարակական և քաղաքական ուժերը, փոխադարձ ատելության քարոզելով, հակասություններ են սերմանում ժողովրդի մեջ։ Իսկ որքան շատանում են այդ հակասություններն ու ատելությունը, այնքան ավելի անհաջող է ընթանում մեր երկրի գործը։ Այստեղ առանցքային դեր ունի իշխանության գործելաոճը․ իշխանությունը չկարողացավ դեղին մամուլի խմբագրի մտածողությունից վերածվել պետական միավորող գործչի։ Մյուս կողմից՝ ընդդիմության նկատմամբ անարդար վերաբերմունքը նույնպես խանգարում է իրավիճակին սառը ու ոչ էմոցիոնալ մոտենալ։ Եթե տարիներ առաջ իշխանությունները խոսում էին «հպարտ քաղաքացիների» մասին, ապա այսօր փորձում են համոզել, թե մեր ժողովուրդը պիտի զիջի ու համակերպվի։ Բայց հայ ժողովուրդը իր ձևը ունի, և մենք պետք է դա բոլորին ցույց տանք»,- ասալ է Կարապետյանը։
Այնուհետև Կարապետյանը նշել է, որ ազգային բարերար Սամվել Կարապետյանի համախոհների ու գործընկերների հետ հայտարարում են «Մեր ձևով» կամավորական շարժման հիմնադրման մասին։
«Ինչո՞ւ հենց կամավորական շարժում, այլ ոչ կուսակցություն։ Որովհետև կամավորական ձևաչափը հնարավորություն է տալիս հասարակությանը համախմբել ոչ թե բաժանարար գծերով, այլ՝ հանրօգուտ գործերի շուրջ։ Շարժումը ապաքաղաքական միավորում է բոլոր նրանց, ովքեր պատրաստ են անձնուրաց ծառայել ընդհանուր նպատակի համար։ Մասնակից կարող է դառնալ ցանկացած մասնագիտության ու հայացքների տեր մարդիկ, ովքեր պատրաստ են իրենց ազատ ժամանակը նվիրել շարժման գործունեությանը»,- ընդգծել է Կարապետյանը։
Վերջում նա հավելել է, որ սա իրենց աշխատանքի առաջին փուլն է։ Քանի որ Հայաստանում առաջիկայում սպասվում են ընտրական գործընթացներ, դրանց մասնակցելու ամենաօպտիմալ ճանապարհը կուսակցական մասնակցությունն է։
«Այդ իսկ պատճառով մեր երկրորդ փուլում շարժման հիման վրա ձևավորելու ենք կուսակցություն, որը մեր մշակած մասնագիտական ծրագրերն ու նախագծերը կվերածի պետական քաղաքականությունների»,- նշել է Կարապետյանը:
