Ռուսաստանի մշտական ներկայացուցիչը հայտարարել է, թե երբ կլուծարվի ԵԱՀԿ Մինսկի խումբը

Ռուսաստանն աջակցում է Ադրբեջանի և Հայաստանի համատեղ որոշմանը՝ լուծարելու ԵԱՀԿ Մինսկի խումբը, որը զբաղվում էր Արցախի հակամարտության կարգավորմամբ. գրում է РБК-ն, նշելով, որ այդ մասին տեղեկացել են ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչից: Նրա խոսքով՝ խմբի վերջնական լուծարումը նախատեսվում է մինչև 2025 թվականի դեկտեմբեր։

Լուկաշևիչի խոսքով, դադարեցվելու է երեք կառույցի գործունեությունը՝ Մինսկի խմբի, ԵԱՀԿ գործող նախագահի անձնական ներկայացուցչի և բարձր մակարդակի պլանավորման խմբի։

«Հաշվի առնելով կողմերի դիրքորոշումը՝ այդ կառույցները պահելու նպատակահարմարություն չենք տեսնում», – ընդգծել է դիվանագետը։

Ավելի վաղ՝ օգոստոսի 26-ին, Ադրբեջանի ԱԳ նախարար Ջեյհուն Բայրամովը հայտարարել էր, որ ԵԱՀԿ Մինսկի խմբի լուծարման մասին որոշումը կընդունվի սեպտեմբերի 1-ին։ Նրա խոսքով՝ այս մեխանիզմը վաղուց արդեն դուրս էր մնացել խաղաղ գործընթացից։

Մինսկի խմբի լուծարումը Բաքվի առաջադրած երկու պայմաններից մեկն է՝ Հայաստանի հետ խաղաղության պայմանագիր կնքելու համար։ Մյուս պայմանն այն է, որ Հայաստանը սահմանադրական փոփոխություններով պետք է վերացնի «Ադրբեջանի ինքնիշխանության և տարածքային ամբողջականության նկատմամբ ունեցած հավակնությունները»։

Հիշեցնենք, որ ԵԱՀԿ Մինսկի խմբի լուծարման մասին դիմումը Բայրամովն ու Հայաստանի ԱԳ նախարար Արարատ Միրզոյանը ստորագրել էին օգոստոսի 8-ին Վաշինգտոնում և ուղարկել կազմակերպություն օգոստոսի 11-ին։