ՀՀ կառավարիչը հայտարարում է՝ մենք որպես զբոսաշրջիկ պետք է գնանք Շուշի՝ շիրիմներ թողած մեր հայրենիք․ Մելիք-Շահնազարյան
Քաղաքագետ Հրանտ Մելիք-Շահնազարյանը գրում է․
«ՀՀ կառավարիչը կանգնում ու շատ հանգիստ տոնով ասում է, թե մենք որպես զբոսաշրջիկ պետք է գնանք Շուշի… Սա է Հայաստանի ղեկավարի առաջարկը Շուշիում տուն-տեղ, շիրիմներ թողած մեր հայրենակիցներին։ Սա է նրա առաջարկն ինձ, մեզ և բոլորիս՝ զբոսաշրջիկ Հայրենիքում։
Պետք է անկեղծ ասեմ՝ դեռևս վաղ երիտասարդության տարիներից Հայրենիքիս նվաճված հատվածներ որպես զբոսաշրջիկ այցելելու միտքը միանգամայն անհասկանալի էր ինձ համար։ Դա է պատճառը, որ ես չեմ եղել Վանում, Կարսում, Սասունում և Արևմտյան Հայաստանի այլ վայրերում։ Երբ դեռ երիտասարդ էի, Արևմտյան Հայաստան գնալը զուտ որպես զբոսաշրջություն էի ընկալում։ Չէի հասկանում, որ շատ շատերն այնտեղ ոչ թե որպես զբոսաշրջիկ, այլ ուխտավոր են գնում։ Ու չնայած հիմա արդեն գիտեմ, որ Արևմտյան Հայաստան մեկնած իմ հայրենակիցների բացարձակ մեծամասնությունն ուխտավորներ են և ոչ թե զբոսաշրջիկներ, միևնույն է, Հայրենիքում զբոսաշրջիկ չլինելու հաստատակամությունս այնքան ամուր է նստած իմ մեջ, որ նույնիսկ որպես ուխտավոր ես չեմ կարող գնալ Արևմտյան Հայաստան։
Ու հիմա իմ պետության ղեկավարն ինձ առաջարկում է Շուշի գնալ զբոսաշրջության…
Ես անպայման կգնամ Շուշի։ Եվ ոչ միայն ես՝ բոլորս։ Չկասկածե՛ք։ Բայց, իհարկե, ոչ երբեք որպես զբոսաշրջիկ։ Կգնամ որպես տեր։ Այնպես, ինչպես գնում էի 5 տարի առաջ։
Կհարցնեք ո՞նց։ Պատասխանեմ՝ երկար՝ քրտնաջան ու տանջալից աշխատանքով լեցուն ճանապարհով։ Անպայման կգնամ։ Ու թեև չգիտեմ, թե երբ կհասնեմ Շուշի՝ 5 տարի անց, թե 10, թե 20…, բայց շատ հստակ գիտեմ, թե երբ եմ բռնելու Շուշի գնալու ճանապարհը։
Օրով ու ժամով կարող եմ ասել՝ ս.թ. սեպտեմբերի 2-ին, ժամը 18։30-ին։ Ճանապարհիս սկիզբն «Ազատության» հրապարակն է։
Վստահ եմ՝ տասնյակ հազարավոր մարդիկ սեպտեմբերի 2-ին նույնպես ճանապարհ կընկնեն դեպի Շուշի։ Աստծով»։
