Ադրբեջանը թալանել ու nչնչաgրել է Ստեփանակերտում Արցախի անhետ կnրածների թանգարանը
«Ադրբեջանը թալանել ու ոչնչացրել է Ստեփանակերտում գործող Արցախի անհետ կորածների թանգարանը. տեղեկացնում են Արցախի Հանրապետության մշակույթի նախարարությունից՝ հիշեցնելով, որ այսօր Բռնի անհետացումների զոհերի միջազգային օրն է:
«Այդ թանգարանը պահպանում էր մեր այն հայրենակիցների անգնահատելի վկայությունները, որոնց ճակատագիրն առ այսօր մնում է անհայտ», – նշել են գերատեսչությունից:
Նախարարության տվյալներով, արցախյան առաջին պատերազմի տարիներից 777 հայ շարունակում է համարվել անհետ կորած։
2020 թ․ 44-օրյա պատերազմից հետո առ այսօր անհետ է 175 զինծառայողի և 20 քաղաքացիական անձանց ճակատագիրը։
2023 թ․ սեպտեմբերին Արցախի բռնազավթման և հետագա բռնի տեղահանության ընթացքում 42 անձ շարունակում է համարվել անհետ կորած։
«Ադրբեջանը ամբողջական պատասխանատվություն է կրում բռնի անհետացումների և այդ ողբերգության հետ կապված մշակութային վկայությունների ոչնչացման համար։ Ստեփանակերտի թանգարանի թալանը և ոչնչացումը ոչ միայն հանցագործություն է Արցախի ժողովրդի հիշողության դեմ, այլև՝ միջազգային իրավունքի կոպիտ խախտում»,-նշում են նախարարությունից:
Ըստ հաղորդագրության, այսօր ակնհայտ է, որ միջազգային կազմակերպությունները չեն կատարել իրենց առաքելությունը՝ պաշտպանելու բռնի անհետացումների զոհերին և պահպանելու մշակութային ժառանգությունը։ Նրանց անգործությունը նպաստում է անպատժելիությանը։
Արցախի ժողովրդի վերադարձի իրավունքը սեփական հողին միակ արդյունավետ մեխանիզմն է մշակութային ժառանգության պաշտպանության, անհետ կորածների հիշատակի վերականգնման և մեր ինքնության պահպանման համար։
«Հարգում ենք յուրաքանչյուր անհետ կորածի հիշատակը և հաստատում․ մեր պայքարը ճշմարտության և վերադարձի համար շարունակվելու է»,- նշում են նախարարությունից՝ հրապարակելով օկուպացիոն վարչակազմի ոչնչացրած Ստեփանակերտի անհետ կորածների թանգարանից լուսանկար։
