Ծննդյան խնջույք, որն ավարտվեց թեյի սեղանի շուրջ. Տիգրան Աբրահամյանը վերհիշել է Բակո Սահակյանի հետ նշած վերջին տարեդարձն Արցախում

Այսօր Արցախի Հանրապետության երրորդ  նախագահ Բակո Սահակյանի ծննդյան օրն է`  65 ամյակը։ Սահակյանի նախկին խորհրդականներից Տիգրան Աբրահամյանը ABC Media-ի հետ զրույցում պատմել է համատեղ անցկացրած ծննդյան օրերի, հիշողությունների մասին։

«Բակո Սահակյանի հետ վերջին անգամ ծննդյան օրը նշել ենք 2019 թվականին։ Որպես կանոն՝ նա անձնական միջոցառումներ չէր կազմակերպում, եղած ժամանակ էլ ոչ իր նախաձեռնությամբ էր։ Իր անձի հետ կապված որևէ բան չէր կարևորում, իր շրջապատի մարդիկ էին համոզում։ 2019 թվականին նեղ շրջանակով նշել ենք նրա ծննդյան օրը, բաժակ բարձրաձրել միասին առանց ճոխությունների»,- վերհիշել է Աբրահամյանը։

2019-ի այս օրվա նրանց խնջույքը տաք թեյով է ավարտվել։ Դրանից հետո հիմնականում հեռախոսազանգով է շնորհավորել նախագահի ծնունդը։

2024-2025 թվականների ծննդյան օրերը Բակո Սահակյանը ադրբեջանական բանտում է անցկացնում։ Նախկին խորհրդականը նրան ամուր առողջություն ու հայրենիք շուտափույթ վերադարձ է մաղթում։

«Նախագահն իր բնավորությամբ այնպիսի մարդ է, որ բոլոր դժվարությունները կարող է հաղթահարել։ Բակո Սահակյանը մեր ազգի համար ոչ միայն առաքելություն կատարած մարդ է, այլև պետք է այդ առաքելությունը շարունակի»,- ասել է Տիգրան Աբրահամյանը։