Մենք այլևս գումար չենք ծախսում Ուկրաինայի պատերազմի վրա. Թրամփ
Դոնալդ Թրամփը չի բացառում, որ ամերիկյան ռազմաօդային ուժերը կարող են ներգրավվել Եվրոպայի անվտանգության ապահովման հարցում՝ Ռուսաստանի և Ուկրաինայի միջև պատերազմը դադարեցնելու նպատակով. ասել է Թրամփը Daily Caller-ին տված հարցազրույցում։
ԱՄՆ նախագահը, որը հանդիպել է լրատվամիջոցի թղթակցին Սպիտակ տանը, ներկայացրել է իր մոտեցումները՝ ընդգծելով, որ ինքը պատրաստ է աջակցել անվտանգության երաշխիքներով, եթե դա օգնի վերջ տալու պատերազմին։
«Յուրաքանչյուր շաբաթ հազարավոր երիտասարդներ են զոհվում։ Եթե ես կարողանամ կանգնեցնել դա, իսկ երբեմն մեր ինքնաթիռները թռչեն երկնքում, հիմնական ծանրաբեռնվածությունը կլինի եվրոպացիների վրա։ Բայց մենք կօգնենք նրանց, եթե դա խաղաղություն բերի», – ասել է նա։
Միաժամանակ Թրամփը հերքել է, որ պատրաստ է ամերիկյան զինվորականներ ուղարկել Ուկրաինա․ «Սա մեր պատերազմը չէ։ Մենք այլևս գումար չենք ծախսում այդ պատերազմի վրա։ Մենք սպառազինություն ենք վաճառում ՆԱՏՕ-ին, ոչ թե Ուկրաինային։ ՆԱՏՕ-ն է վճարում դրա համար»։
Նա նաև նշել է, որ չի հավատում Վլադիմիր Պուտինի և Վոլոդիմիր Զելենսկիի շուտափույթ հանդիպման հնարավորությանը՝ ընդգծելով, որ կողմերը դեռևս պատրաստ չեն երկխոսությանը։
Թրամփը ներկայիս իրավիճակի համար կրկին մեղադրել է իր քաղաքական ընդդիմախոսներին՝ ընդգծելով, որ ինքը «ժառանգել է այս պատերազմը» և այժմ փորձում է «հանգցնել կրակը»։
Նրա խոսքով՝ ԱՄՆ-ը չի ուղարկի ցամաքային զորքեր, սակայն պատրաստ է քննարկել օդային աջակցությունը՝ Եվրոպային օգնելու համար։
