«Իմ սիրելի ընկեր». Սի Ծինփինը հանդիպել է Իլհամ Ալիևի հետ
Չինաստանի նախագահ Սի Ծինփինը «իմ սիրելի ընկեր» բառերով է դիմավորել Ադրբեջանի նախագահ Իլհամ Ալիևին։
Սի Ծինփինը ընդգծել է, որ ավելի քան 30 տարվա ընթացքում Ադրբեջանն ու Չինաստանը ձևավորել են հաջող համագործակցություն, և ներկայումս երկկողմ կապերը զարգանում են համապարփակ ռազմավարական գործընկերության մակարդակով։
Նա գոհունակությամբ հիշել է Իլհամ Ալիևի պետական այցը Չինաստան և նշել այցի ընթացքում անցկացված բանակցությունների կարևորությունը։
Հանդիպման ընթացքում Ալիևը հայտարարել է, որ Երևանի ու Բաքվի միջև կարգավորման և խաղաղության շուրջ բանակցություններն ընթանում են երկկողմ հիմունքներով, և «երկու երկրների միջև արդեն հաստատվել է խաղաղություն»:
Սի Ծինփինը նշել է, որ ադրբեջանա-չինական համագործակցությունը ամրապնդվում է նաև «Մեկ գոտի, մեկ ճանապարհ» ծրագրի շրջանակներում՝ ընդգծելով Չինական ապրանքների Ադրբեջանով փոխադրման և Տրանսկասպյան երթուղու կարևորությունը։
Ալիևի օգնական Հիքմեթ Հաջիևն էլ լրագրողների հետ զրույցում ասել է՝ Չինաստանի և Ադրբեջանի միջև ապրանքաշրջանառությունը աճել է 40 տոկոսով, և սա դեռ վերջնական սահմանը չէ։
