Հնդկաստանի վարչապետը յոթ տարվա ընթացքում առաջին անգամ այցելել է Չինաստան
Հնդկաստանի վարչապետ Նարենդրա Մոդին և ՉԺՀ նախագահ Սի Ծինփինը քննարկել են երկկողմ հարաբերությունները. հայտնում է CNN-ը:
Չինաստանի նախագահ Սի Ծինփինն ասել է Մոդիին, որ Միացյալ Նահանգների հետ անհամաձայնությունների ֆոնին երկրների միջև բարեկամությունը ճիշտ որոշում է երկու կողմի համար:
«Երկու կողմերի համար էլ ճիշտ ընտրություն է լինել բարեկամներ, ունենալ բարիդրացիական և բարեկամական կապեր, լինել գործընկերներ, որոնք նպաստում են միմյանց հաջողությանը», – ասել է Չինաստանի առաջնորդը՝ նշելով, որ աշխարհում դարակազմիկ փոփոխություններ են տեղի ունենում:
Հնդկաստանի վարչապետն ընդգծել է, որ երկրներին հաջողվել է վերականգնել օդային երթևեկությունը և համաձայնության գալ սահմանային վերահսկողության վերաբերյալ:
«Երկկողմ համագործակցությունը կապված է մեր երկրների բնակչության՝ 2.8 միլիարդ մարդկանց շահերի հետ. սա նաև կհարթի ճանապարհ ողջ մարդկության բարեկեցության համար: Հնդկաստանը մտադիր է զարգացնել Չինաստանի հետ հարաբերությունները՝ հիմնված փոխադարձ վստահության և հարգանքի վրա»,- ասել է Մոդին։
Մոդին նաև արդյունավետ է անվանել Կազանում BRICS գագաթնաժողովի շրջանակում Սի Ծինփինի հետ հանդիպումը և ընդգծել, որ այնտեղ շատ դրական քննարկումներ են տեղի ունեցել։
Նշենք, որ սա Հնդկաստանի վարչապետի առաջին այցն է Չինաստան յոթ տարվա ընթացքում. երկրների միջև հարաբերությունները մնում էին լարված 2020 թվականի սահմանային բախումներից հետո:
