Հայաստանի և Պակիստանի ԱԳ նախարարները ստորագրել են դիվանագիտական հարաբերություններ հաստատելու մասին համատեղ կոմյունիկե
Հայաստանի Հանրապետության ԱԳ նախարար Արարատ Միրզոյանը հանդիպել է Պակիստանի փոխվարչապետ և ԱԳ նախարար Մոհամմադ Իշաք Դարի հետ. հայտնում է ՀՀ ԱԳՆ-ն:
ԱԳ նախարարները ստորագրել են Հայաստանի և Պակիստանի միջև դիվանագիտական հարաբերություններ հաստատելու մասին համատեղ կոմյունիկե:
Հայաստանի և Պակիստանի կառավարությունները համաձայնել են փոխանակվել Ներկայացուցիչներով և միմյանց ցուցաբերել անհրաժեշտ աջակցությունը՝ «Դիվանագիտական հարաբերությունների մասին» 1961 թ. Վիեննայի կոնվենցիային և միջազգային սովորույթային պրակտիկային համապատասխան փոխադարձության հիման վրա դիվանագիտական հարաբերությունների կյանքի կոչման նպատակով։
Հանդիպման ընթացքում զրուցակիցները նաև քննարկել են երկկողմ համագործակցության զարգացման հեռանկարները՝ անդրադառնալով տարածաշրջանում տեղի ունեցած վերջին իրադարձություններին.
«Անդրադառնալով տարածաշրջանային զարգացումներին՝ Արարատ Միրզոյանը ներկայացրել է Հարավային Կովկասում կայուն խաղաղության հաստատմանն ուղղված ՀՀ ջանքերը և այդ համատեքստում ընդգծել, որ Հայաստանի և Ադրբեջանի միջև հաստատվել է խաղաղություն։ Այս կապակցությամբ Պակիստանի փոխվարչապետ, ԱԳ նախարար Իշաք Դարը շնորհավորել է ՀՀ ԱԳ նախարարին», – ասվում է ԱԳՆ-ի տարածած հայտարարության մեջ։
