Չինաստանի զենքի ցուցադրությունը արտացոլում է երկրի նախագահի՝ համաշխարհային նոր կարգի տեսլականը

Չորեքշաբթի Չինաստանում տեղի ունեցած հսկայական ռազմական շքերթը զենքի նպատակադրված և հզոր ցուցադրություն էր։ Շքերթը կրում էր հետևյալ ուղերձը․ Սի Ծինպինի՝ համաշխարհային նոր կարգի տեսլականում Չինաստանը գտնվում է կենտրոնում՝ իր բարձր տեխնոլոգիական զենքերով, որոնք շատ դեպքերում, կարծես, ավելի հզոր են իր մրցակիցների զենքերից․ գրում է CNN–ը։

Մինչդեռ շքերթից հետո մեծ ուշադրություն կդարձվի նոր հեռահար միջուկային զենքերի վրա, ինչպիսին է DF-61 միջմայրցամաքային բալիստիկ հրթիռը, երկարաժամկետ հեռանկարում ավելի կարևոր նշանակություն կարող են ունենալ այնպիսի զենքեր, ինչպիսիք են բեռնատարների և նավերի վրա տեղադրված նոր շարժական լազերային հակաօդային պաշտպանության զենքերը։

Չինացի պաշտոնյաները շքերթից առաջ կայացած մամուլի ասուլիսներում հայտարարել են, որ նշված զենքերը մեծ քանակությամբ տեղակայված են երկրի զինված ուժերում։ Իսկ դա կարող է իրական խնդիրներ առաջացնել ցանկացած հակառակորդի համար՝ տարածաշրջանում չինական ռազմական շարժը զսպելու համար։

Նշվում է, որ ցուցադրված զենքերից առանձնակի ուշադրության են արժանի DF-61-ը՝ ութ առանցք ունեցող բեռնատարով տեղափոխվող հսկայական միջմայրցամաքային բալիստիկ հրթիռը, հիպերձայնային սահող տրանսպորտային միջոցներով (HGV) հրթիռները․ HGV-ները կարող են կրել մարտագլխիկներ ձայնի արագությունից հինգ անգամ ավելի արագությամբ՝ անկանոն թռիչքի հետագծերով:

Ցուցադրվել է նաև անօդաչու թռչող սարքերի տպավորիչ շարք՝ սկսած գերմեծ ստորջրյա անօդաչու թռչող սարքերից մինչև ինքնաթիռներ։ Ներկայացվել են նաև ցամաքային անօդաչու թռչող սարքեր, որոնցից մի քանիսը զինված էին գնդացիրներով, մյուսները՝ նախատեսված ականազերծման կամ լոգիստիկայի համար։ Այնուհետև ցուցադրվել է լազերային զենքի երկու տարբերակ՝ մեկը մեծ, որը նախատեսված էր ծովային հակաօդային պաշտպանության համար, մյուսը, որն ավելի փոքր էր և տեղադրված էր բեռնատարի վրա, ցամաքային զորքերը պաշտպանելու համար է նախատեսված։