ՀՅԴ Հայ դատի կենտրոնական խորհուրդը շարունակում է աջակցել Երուսաղեմի հայ համայնքին․ հայտարարություն

Հ.Յ.Դ. Հայ Դատի Կենտրոնական Խորհուրդը ողջունում է Սրբոց Յակոբեանց Միաբանության ընդհանուր ժողովի 2025 թվականի սեպտեմբերի 24-ի նիստի որոշումը, ըստ որի «Կովերի Պարտեզ (Հայոց Պարտէզ)»-ի վարձակալության հարցով 2021 թվականին ստորագրված պայմանագիրը  հռչակվում է «անօրինական, հակականոնական եւ անվավեր» և  մերժում է «հաշտարարի միջոցով ձեռք բերվածը հավելվածը (Addendum) և կարգավորման համաձայնագիրը»։ Միաբանության ընդհանուր ժողովը նաև որոշել է «հետապնդել չեղարկման դատական հայցն ընդդեմ «Զանա Կարտընս» ընկերության»։

Իր այս որոշումներով Սրբոց Յակոբեանց Միաբանությունը  վերահաստատում է իր հանձնառությունը եւ իրավական պարտավորությունը՝  Երուսաղեմի հայապատկան հողերը տնօրինելու հօգուտ հայ համայնքի։

Կրկնում ենք, որ հարցի կարգավորումը պետք է կատարվի բացառապես տեղական և միջազգային օրենքների հիման վրա՝ առանց ուժ կիրառելու կամ ուժ կիրառելու սպառնալիքի։ Երուսաղեմի մեջ հայկական իրավունքների հարցը  վերաբերում է համայն հայությանը, հետևաբար՝ այդ իրավունքները ոտնահարելու որևէ փորձ ենթակա է համայն հայության համարժեք վերաբերմունքին։

Հ.Յ.Դ. Հայ Դատի Կենտրոնական Խորհուրդը, գործակցելով Հայ Դատի համաշխարհային ցանցի հետ, շարունակում է իր բոլոր հնարավորություններով զորավիգ լինել Երուսաղեմի հայ համայնքին և Հայոց պատրիարքությանը՝ պաշտպանելու իրենց հազարամյա իրավունքները։

Հ.Յ.Դ. ՀԱՅ ԴԱՏԻ

ԿԵՆՏՐՈՆԱԿԱՆ ԽՈՐՀՈՒՐԴ

26 Սեպտեմբեր 2025»։