Գառնիկ Դանիելյանն ԱԺ ամբիոնից ներկայացրեց Բագրատ սրբազանի նամակը
Այսօր Ազգային ժողովում հայտարարությունների ժամին «Հայաստան» խմբակցության պատգամավոր Գառնիկ Դանիելյանն ընթերցեց ԱԱԾ շենքում գտնվող «Երևան–Կենտրոն» քրեակատարողական հիմնարկից ուղարկված Բագրատ սրբազանի նամակը։
Նամակում սրբազանն իր դիրքորոշումն է ներկայացնում կալանքի վերաբերյալ։
«Տերն իմն է՝ լույսը և կյանքը, ես ումի՞ց վախենամ»,- ասվում է նամակում։ Նա ընդգծում է, որ ամբողջ կյանքում իրեն ուղեկցել է աղոթքը, և որ նա ընտրել է «մեր հայրենիքի և եղբայրների հետ կալանքը և նույնիսկ մահը, քան ուրացողների հետ բաժին ունենալը»:
Բագրատ սրբազանը նաև անդրադառնում է անպատասխան թողնված հարցումներին. «Այս երեք ամսվա ընթացքում երկու անգամ հրապարակային հարցում եմ ուղարկել գլխավոր դատախազին, քննչական կոմիտեի ղեկավարին, բայց մնացել են անպատասխան»,- նշում է նա։
Նամակում հստակ հարցեր են հնչում. «Ինչի՞ն է վերաբերվում երկու հոգու գնդակահարելու և 15 հոգու բանտ դնելու ձեր այդքան սիրված պատմությունը։ Եվ արդյոք ձեր ներկայացված ձայնագրությունները փորձաքննության ենթարկվել են, թե ոչ»։
Բացի այդ, սրբազանը նշում է՝ տեղեկություններ են հասել, որ «մեր գործն ինչ-որ ունի ռուսական հետքեր», և պահանջում է հստակ պատասխաններ. «Եթե առկա են, ապա ի՞նչ պատասխան ունեք դրան, այլապես ՀՀ իրավապահ պատմության մեջ առաջին անգամ ձեր իսկ նկարագրած ձայնագրությունները չէիք թարգմանի այլ լեզուներով»։
Նամակը եզրափակում է հետևյալ բարեմաղթանքով. «Կեցցե Արարատը, Սուրբ Էջմիածնով, Արցախով և մեր նահատակներով սրբագրված հավերժական Հայաստանը»։
Գառնիկ Դանիելյանն ընդգծեց, որ այս խոսքերը ներկայացվում են նաև ԱԺ պատգամավոր և հայրենիքի կալանավոր Արթուր Սարգսյանի և մյուս 16 կալանավորների անունից։
