Թուրքիան շարունակելու է Ռուսաստանից բնական գազ գնել՝ չնայած ԱՄՆ-ի կոչերին

Թուրքիան շարունակում է Ռուսաստանից բնական գազ գնել՝ չնայած ԱՄՆ-ի կոչերին՝ հրաժարվել ռուսական էներգառեսուրսներից. հայտնել է Թուրքիայի էներգետիկայի նախարար Ալփարսլան Բայրաքթարը:

«Մենք պայմանագրեր ունենք Ռուսաստանի հետ, մոտենում է ձմեռը։ Մեր քաղաքացիներին չենք կարող ասել, որ գազ չկա», — ասել է Բայրաքթարը։

Նա հավելել է, որ Թուրքիային անհրաժեշտ է գազ ստանալ Ռուսաստանից, Ադրբեջանից և Թուրքմենստանից՝ կախված երկրի էներգետիկ պահանջներից։

Սեպտեմբերի 25-ին Վաշինգտոնում ԱՄՆ նախագահ Դոնալդ Թրամփը Թուրքիայի նախագահ Ռեջեփ Թայիփ Էրդողանին կոչ էր արել դադարեցնել ռուսական էներգառեսուրսների գնումը։

Բայրաքթարը նաև նշել է, որ Ռուսաստանի հետ բանակցություններ են ընթանում «Blue Stream» գազատարի միջոցով Թուրքիային գազի մատակարարման պայմանագրի երկարաձգման շուրջ։

Hurriyet թերթի հաղորդմամբ՝ Ռուսաստանը 2024 թվականին, ինչպես նաև 2023-ին, եղել է Թուրքիայի հիմնական մատակարարը՝ գազի, նավթի և նավթամթերքների ոլորտում։

Ռուսաստանը Թուրքիային գազ է ուղարկում երկու գազատարի միջոցով՝ «Blue Stream»-ը, որը շահագործման է հանձնվել 2003 թ.-ի սկզբին և տարեկան կարող է տեղափոխել 16 մլրդ խմ գազ, և «TurkStream»-ը, որը բաղկացած է երկու գծերից՝ մեկը մատակարարում է Թուրքիային, մյուսը՝ Հարավային և Հարավ-արևելյան Եվրոպայի երկրներին, տարեկան ընդհանուր հզորությունը 31,5 մլրդ խմ է, շահագործման մեկնարկը՝ 2020 թ.-ի հունվարին։