Օդեսայի քաղաքապետը ՌԴ քաղաքացի է. Ուկրաինայի անվտանգության ծառայությունը հրապարակել է անձնագրի պատճենը

Ուկրաինայի անվտանգության ծառայությունը (ՈւԱԾ) հաստատել է Օդեսայի քաղաքապետ Գենադի Տրուխանովին քաղաքացիությունից զրկելու լուրը և տարածել նրա ռուսական անձնագրի լուսանկարը. հայտնում է РБК-ն՝ հղում անելով գերատեսչության հայտարարությանը:

Ըստ հայտարարության՝ Տրուխանովը Ռուսաստանի քաղաքացի է և ունի գործող ռուսական անձնագիր. այն տրվել է 2015 թվականին և դեռևս ուժի մեջ է։

2017 թվականին Տրուխանովի ներկայացուցիչները միջնորդություն են ներկայացրել ՌԴ պատկան մարմիններից մեկին, ինչից հետո Մոսկվայի մարզի դատարանը չեղյալ է հայտարարել նրա ռուսական անձնագիրը, սակայն «լրացուցիչ պարզաբանումներում» դատարանը նշել է, որ այս փաստաթղթի չեղարկումը կամ դրանից հրաժարվելը «չի ենթադրում անձի կողմից օրինականորեն ձեռք բերված Ռուսաստանի քաղաքացիությունից զրկում»։