Հովհաննավանքն ու այլ հուշարձաններ Կառավարության հաշվեկշռում են, հիմքերը կան, որ դրանք վերադարձնենք հանրությանը. Փաշինյանի հայտարարությունները՝ կետերով
Առաքելական եկեղեցին իմ սրբությունն է, իմ սրբության հետ ո՞նց կարող եմ կոնֆլիկտ ունենալ: Ես կոնֆլիկտ ունեմ այդ եկեղեցին պղծողների հետ, բոլոր այդ մարդիկ կարգալույծ են:
Համոզվել եմ, որ Հովհաննավանքն այն տեղն է, որտեղ կարելի է ապրել հոգևոր կյանքով: Ուզում եմ միանալ այն համայնքին, որի հոգևոր հովիվը Տեր Արամ քահանա Ասատրյանն է:
Կտրիճ Ներսիսյանը վաղուց կարգալույծ է, նա մարդ է, որը բռնազավթել է Մայր Աթոռը։
Եթե կարգալույծը կարգալույծ է արել, նշանակում է տեր Արամը այդ օրը նոր օծվել է եկեղեցու՝ ժողովրդի կողմից, ես կգնամ և հաղորդություն կընունեմ Տեր Արամի ձեռքից։
Հովհաննավանքը, ինչպես բազմաթիվ այլ հուշարձաններ, գտնվում են Կառավարության հաշվեկշռում և մի շարք եկեղեցիներ անհատույց օգտագործման են տրված Առաքելական սուրբ եկեղեցում: Կարծում եմ՝ այնտեղ, որտեղ չկա հոգևոր կյանք, այլ կան ինտրիգներ, կան խարդավանքներ, «ֆեյքերեցների» խմբեր են գործում, կան բոլոր բարոյական և իրավական հիմքերը, որ այդ հուշարձանները վերադարձնենք հանրությանը և տեր Արամին և նրա նման քահանաներին բոլոր ձևով կաջակցնեք:
Որ ընտրություններում մենք վարչական ռեսուրս ուզելով, թե չուզելով, անուղղակի կամ ուղղակի օգտագործելու փորձ անենք, այդ ընտրություններում մենք պարտվելու ենք: Սա եղել է և կա իմ համոզմունքը:
Ասում են՝ Վարդան Ղուկասյանը ձերբակալվել է իմ մտքերի պատճառով: Վարդան Ղուկասյանը ձերբակալվել է իր մտքերի ու գործողությունների պատճառով, իմ միտքը կարող է օգտագործվել իմ դեմ, ինչպե՞ս կարող է իմ միտքը օգտագործվել ինչ֊որ մեկի դեմ:
Կարող ա՞ վարկած առաջանա, որ այս ամբիոնից մարդկանց հոգեխանգարում եմ, որ գնան կաշառք վերցնեն:
Մեր ընդդիմության մի հսկայական հատվածի` ամենաակտիվ հատվածի խոսույթներն ու քաղաքականությունները մշակվում են Հայաստանից դուրս:
Ովքեր խոսում են՝ Հայաստանը կործանվում ա, էս ա անում, էն ա անում, իրենք ուրիշ երկրի մասին են խոսում, իրենք Հայաստանը չեն ճանաչում։ Իրենք ուրիշ կինոյի մեջ են, էդ կինոն ավարտվել ա վաղուց, բայց իրենք խոտանված կադրերը հանում են, հետևից կպցնում։ Երբ Հայաստանը չի կործանվում, իրենք չեն կարողանում էդ Հայաստանի հետ հարաբերվեն:
