Ո՞վ է աշխատանքից ազատված փոխոստիկանապետը և ինչո՞վ է հայտնի

Հայաստանի Հանրապետության նախագահը հոկտեմբերի 31-ի հրամանագրով Հայկ Բաբայանին ազատել է Հայաստանի Ներքին գործերի նախարարության ոստիկանության զորքերի հրամանատարի և ոստիկանության պետի տեղակալի պաշտոններից։ Ըստ մամուլի տեղեկության՝ նա կնշանակվի Ոստիկանության Գվարդիայի պետ։

Վերհիշենք՝ ո՞վ է Հայկ Բաբայանը, ի՞նչ կենսագրություն ունի և ինչ ճանապարհ է անցել։

46–ամյա գեներալ-մայորը ունի երկու մասնագիտություն՝ մարզիչ-մանկավարժ և իրավագետ։ Ավարտել է նախ Ֆիզիկական կուլտուրայի պետական ինստիտուտը, ապա՝ ՀՀ ոստիկանության կրթահամալիրի մագիստրատուրան՝ ստանալով իրավագիտության մասնագիտություն։ 2012-2020  թվականներին Հայկ Բաբայանը զբաղեցրել է ոստիկանության զորքերի հրամանատարի անձնակազմի հետ տարվող աշխատանքների գծով տեղակալի պաշտոնը։

2020 թվականի նոյեմբերի 16-ին նշանակվել է ոստիկանության զորքերի հրամանատար և ոստիկանության պետի տեղակալ։

Ըստ մամուլում տարածված լուրերի՝ եղել է բողոքի ակցիաների ժամանակ ոստիկանների գործողությունները համակարգողը։

ՆԳՆ բարձրաստիճան պաշտոնյան հայտարարագրել է 5 հողամաս, 2 անհատական բնակելի տուն, 1 ավտոմեքենա, ՆԳՆ–ից ստացած 13 մլն դրամ 330 հազար եկամուտ։