Ադրբեջանցի բնապահպանները Փաշինյանից պահանջել են փակել ՀՀ տարածքում գործող բազմաթիվ հանքեր․ ադրբեջանագետի մեկնաբանությունը
Ադրբեջանում գործող 24 հասարակական կազմակերպություն բաց նամակով դիմել է Նիկոլ Փաշինյանին։ Պահանջում են դադարեցնել ՀՀ տարածքում գտնվող ավելի քան 12 հանքարդյունաբերական ընկերությունների գործունեություն՝ պատճառ բերելով «Էկոլոգիական» որոշ հարցեր։
Ցանկում Քաջարանի Զանգեզուրի պղնձամոլիբդենային և Կապանի լեռնահանքային կոմբինատներն են, Ագարակի պղնձամոլիբդենային կոմբինատը, Սոթքի հանքավայրը, որը գտնվում է Ադրբեջանի հետ սահմանին։ Շնող և Թեղուտ գյուղերի որոշ բնակիչների հողատարածքները, Գեղարքունիքի մարզում գործող ոսկու հանքարդյունաբերությունը, Հայաստանի Լոռու մարզի Ախթալայի հանքավայրը, Կապանի ալյումինի գործարանը, Կոտայքի մարզում գործող պղինձ, ցինկ և կապար արտադրող մետալուրգիական գործարանը, Գեղարքունիքի մարզի պղնձաձուլական գործարանը, Երասխի մետալուրգիական նոր կառուցվող գործարանը և Ամուլսարի ոսկու հանքավայրը։
Abc media-ի հետ զրույցում ադրբեջանագետ Արամ Փոլադյանը նշեց, որ այս ամենի հետևում կանգնած է Ադրբեջանի կառավարությունը․
«Նախկինում մենք չենք ունեցել նման նախադեպ։ Ադրբեջանը իրեն թույլ է տալիս միջամտել Հայաստանի ներքին հարցերին, անգամ խոսել միջազգային հանրության իրավունքից։ Բացի այդ սա նաև կանխարգելիչ քայլ է, որով ուզում են ցույց տալ, թե Երասխում կառուցվող գործարանը չի համապատասխանում միջազգային չափորոշիչներին»-, նշեց Արամ Փոլադյանը:
