Քանի դեռ Զելենսկին նախագահ է, նա չի համաձայնի տարածքներ զիջել խաղաղության դիմաց․ Երմակ
Քանի դեռ Զելենսկին նախագահ է, նա չի համաձայնի տարածքներ զիջել խաղաղության դիմաց․ The Atlantic-ի լրագրող Սայմոն Շուստերին տված հարցազրույցում ասել է Ուկրաինայի նախագահի աշխատակազմի ղեկավար Անդրեյ Երմակը։
«Այսօր ոչ մի ողջամիտ մարդ չի ստորագրի տարածք զիջելու մասին փաստաթուղթ։ Քանի դեռ Զելենսկին նախագահ է, ոչ ոք չպետք է հույս ունենա, որ մենք տարածքներ կզիջենք։ Նա չի ստորագրի տարածք զիջելու մասին փաստաթուղթ։ Սահմանադրությունն արգելում է դա։ Ոչ ոք չի կարող դա անել, եթե չի ցանկանում հակասել Ուկրաինայի սահմանադրությանը և ուկրաինացի ժողովրդին»,- հայտարարել է Երմակը։
Նրա խոսքով՝ Ուկրաինան պատրաստ է քննարկել միայն այն, թե որտեղով է անցնելու հակամարտող կողմերի կողմից վերահսկվող տարածքները սահմանազատող գիծը։ «Այժմ մենք իրատեսորեն կարող ենք քննարկել միայն շփման գծի հարցը»,- ասել է Երմակը։
Ավելի վաղ հաղորդվել էր, որ Ուկրաինան համաձայնել է ամերիկյան կողմի առաջարկած խաղաղության ծրագրի պայմանների մեծ մասին։ Դոնալդ Թրամփի խոսքով՝ Ուկրաինայի համար խաղաղության ծրագիրը սկզբնական 28 կետից կրճատվել է մինչև 22։ Սակայն տարածքային և Ուկրաինայի ՆԱՏՕ-ին անդամակցության հարցերը մնացել են չլուծված. Զելենսկին, ինչպես սպասվում է, դրանք կքննարկի Թրամփի հետ հանդիպման ժամանակ։
