Խաղաղություն ենք կառուցում ոչ միայն Հայաստանի կառավարության, այլև ժողովրդի հետ․ Հաջիև
Թրամփի վարչակազմը մեծ նվիրվածություն ցուցաբերեց խաղաղության օրակարգին․ The Washington Post-ի հետ զրույցում հայտարարել է արտաքին քաղաքականության գծով Ադրբեջանի նախագահի խորհրդական Հիքմեթ Հաջիևը:
Հաջիևի խոսքով՝ Հայաստանն ու Ադրբեջանը «պայքարում են խաղաղությունն ամրապնդելու համար»։
«Երկու երկրներն էլ՝ Ադրբեջանը և Հայաստանը, պայքարում են խաղաղությունն ամրապնդելու համար, սակայն Կոնգրեսում ոմանք առաջարկում են բացարձակապես ավելորդ և բաժանարար օրենսդրական քայլեր։ Դժբախտաբար, Բայդենի և Բլինկենի օրոք մենք բազմաթիվ թյուրըմբռնումներ ենք ունեցել, և մեծ վնաս է հասցվել», – ասել է նա։
Ալիևի խորհրդականը նաև նշեց, որ Ադրբեջանը ամրապնդում է տնտեսական փոխկախվածությունը Հայաստանի հետ՝ մատակարարելով նավթամթերք և նպաստելով հացահատիկի առաքմանը հայկական շուկա։
«Սա կարող է խորհրդանշական թվալ, բայց այդ խորհրդանշականության հետևում թաքնված են լուրջ աշխարհաքաղաքական հետևանքներ․ մենք խաղաղություն ենք կառուցում ոչ միայն Հայաստանի կառավարության, այլև նրա ժողովրդի հետ», – եզրափակել է Հաջիևը։
